NGEICHIA TEIN:KA FAR DAWT KHA UICO-RUAK BANTUKIN KAN RAK VUI.

Theihtlei

Tang hnih ka cawn kum, 1981 kum ah asi. Matupi peng, Dai Ram, Rung khua mission field ah kan inchungkhar in kan rak um lio asi. Rung cu inn 40 an rak si i Matupi in ke in ni hnih kal asi. Cozah siangin tangli tiang a rak um. Cozah nih si-sayamah pakhat an rak chiah. Asinain sayamah cu Rung khuate i um kha a zuam lo caah a caan te lawng ah Rung ah cun a um tawn i a tam deuh cu Matupi ah a um peng. Rung nih sayamah an ngeih le ngeih lo hmanh an i thei lo.

April thla, 1981 kum ah khuh-hip rai a rak um. Keimah kha a rak ka tlaak hmasa bik. Kan khuh ahhin dinlo bakin khuh tluahmah asi i kan tha zong a dih dih. An khua ah sidawr a um lo. Si tlang khat va cawk ding ah, Matupi bakah ke in ni hnih va kal a hau. Matupi ah si caw dingmi tlangval kan rak ngeih lo caah zawtnaak hi si ding lo bakin a in in kan rak in hna.

Kei cu ka thisa a tthawn deuh caah zarh khat hnu ah ka dam tthan. Asinain ka farle pahnih kha a tlaak ve hna. Sau zong an zaw manh tuk lo. Ka nau deuh, nu cu a thi colh i ka u nu zong cu a thi zau ding in a um ve.

Athi ciami ruak hi Rung ah vui khawh asi ko nain, a nung rihmi ka u nu hi Matupi sizung ah a rannaak in kalpi a herh ve caah mizaw he mithi he Matupi tiang rak kan thlah uh tiah khuami kan nawl hna. Khua mi cu a rannaak in an i tim ve i ka farnu a thih zing bakin kan i thawh colh.
Matupi cu Rung cun nihnih lamkal asi caah ruak kha Matupi kan phanh ahcun a thu tuk te lai ti kha kan theih cia. Cucaah pasal ttha pakhat kha Rung in Matupi tiang ni khat ah kheng kho ding in kan kal ter i Khrihfabu kha thlan rak kan cawh piak ding in kan fial ter chung.

Mithi he, mizaw he hngakchia he kan kal caah a ni hnihnaak zan 8:00 ah Matupi khua kutka ah kan lut. Ka farnu ruak cu a thut tuk caah inn ah lanhpi awk a ttha ti lo i thlan ah an langhpi. Adang poh cu Matupi kan tlun inn le sizung cu kan fuh i ka pa le Khrihfa upa tlawnpal nih ka far nu ruak cu zan 9:00 ah a va vui.

Asinain lamkal kan thlahmi pa nih khan thlan cawh kong lawng kha a chimh hna, ruak-kuang ser kong a chim hna lo. Cucaah thlan lawng cu an rak cawh i ruak-kuang kha an rak tuah lo. Cucaah ka far dawt cu sattil a thimi bantuk in thlan ah cun ruak kuang lo in vui asi i vawlei le, thing le lung cu chilh chih a rak si.

Ka pa nih kan far dawt ruak-kuang lo i an vui kha a kan chim duh bak lo. Asinain aluan cia kum 4 ah khan ka pa kha ka hal tthan. Ka pa, “Ka farnu caah khan, ruak kuang an rak putmi ka hmuh ttung lo, ruak-kuang lo in maw nan rak vui” tiah ka hal. Ka pa nih, “Aw, ruak-kuang loin kan rak vui ko” a ka ti.An thihnaak kum 30 hrawng asi cangmi ka philh ko cangmi kha a thar in ka ngaih a von chia tuk tthan. Ka celh lo. A thar in ka mittli a tla. Khrihfabu um ko nak hmun i ruak-kuang lo hna i rak vui cu ka ti.

Asinain, Bible bia in thazaang kai laak tthan. Minung cu leidip kan si ko. Kan thih cang hnu ahcun ruak-kuang in kan vai vui zongah zeihme a tthat hlei nak a um, leidip i a kir ding ciocio. An vuimi hi ka far taktak a si ttung lo, ka far a rak umnaak thlam pei an vuimi hi asi ko cu, ka far cu vancung ah pei a um cang cu timi bia nih thazaang a ka peek i lawmhnaak in ka khat tthan.
Ka u nu nunaak tal asi ah tiin cu tluk cun kan buaipi nain ka u nu zong cu ni hnih hnu ah Bawipa sin ah a kan kal taak ve tthiam. Kan khamh manh hlei ti lo.

Asinain Pathian nih a ka dawt i an thih hnu ahhin zarh khat chung cu, zan i ka mang poh ahhin mithi ka farle he lawngte kan i kom hna. Cu, zarh khat a dih hnu cun nihin ni tiang ka mang ah ka hmu kho ti hna lo. Anmah tu nih zarh khat chung ka mang ah an ka komh i an rak ka hnemh.Aung Min Thang

Leave a Reply