Ram a dawh:Taktak lo mi kan herh lo tibak sicang hi’Laitlang cu a linsa cang ko.

Theihtlei

Ralhrnag ralkap nih uknak an lak hnu in kawlram pi mino hna nih hriamnam hmang loin, ralthatnak, lungrualnak, dawtnak le ramdawtnak thinlung he bak ralkap kan doh. Acheu an tlau, a cheu tlaih an tong, a cheu hliam an tuar, a cheu an nunnak adih.Ramkheel ah kan pale biatak tein a aukhuang tawnmi hna zong an hmurka theih a si ti lo. Dr. Lian Hmung Sakhong le Salai Bawi Lian Mang dah tilo ramkheel upa vialte an aw ann theih an si ti lo.2020 thimnak ah MP a tling mi hna.

MP thutden cu politics he aa pehtlai mi thutden a si. Cu bantuk thutden cu a raltha i ram a daw mi hna ramkheel upa hna nih an co ding mi thutden a si. Thih ri le nunri, harnak he aa naih tuk mi thutden a si.

MP kan i cuh mi cu mipi caah harnak ton kha i thim a si. Nihin ah MP aa cuh lomi hna nunnak tu ram le miphun caah an dih. kan chim duh mi cu ziah khoika nan zam zong ah nan umnak hmun tel in online in mipi sin biacah le thapeknak ca zong nan tial bal ve lo. Atak tak le ngaingai kan ti ahcun MP na tlin cang hnu ahcun sa le ral lak zong ah mipi he naih niam tein na um ve a herh. Mipi zong nih kan si khawh chung in kan in humhak ko hna. Ramleeng um kan miphun hawi hna nih an caan dih le an ngeihchiah chawva dih in an umnak cio in ralkap an rak doh, Ramchung mi nih thih ri le nunri ah ralkap hmaitonh in kan doh. Cu lio ah nang cu na himnak kong ah mipi sin in na tlau. na awka theih a si ti lo. Ralkap dohnak ah na mipum hrimhrim in na tel a herh kan ti lo, Online tal in thapek nak le ralkap dohnak ca tlang tawi tial hmanh caan na pek khawh lo mi cu mipi hi sio rawl ah na kan tarh tluk a si.

Mipi na kan aiawh bantuk in ralkap nih an in tlaih sual hmanh ah a phu ko daw kaw, ram ca harton le MP thutden a man tuak tik ah a phu ve ko daw kaw? Kei cu vote kan pek lio ah khan mipi kan harnak zong tuar chih ding in ka rak in vote mi na si. MP cu aiawhtu a si, Mipi harnak vialte aiawhtu, mipi caah lawmhnak zong aiawhtu, thih nunnak zong ah aiawh tu na si.
Ramkheel upa

Miphun le ram caah ramkheel upa timi hna nan hmurka theih a si ti lo. CDM cawlcanghnak hi kanmah tein tha kan i pe, harnak kan i hrawm, kan i fimtawl lio ah ralkap dohnak bia cu chim hlah, ralkap a doh mi hna mipi thapek nak le forhfialnak cabia kan thei ti lo. Adik mi Federal uknak politics cu thih ri le nunri ah a um. Phundang in kan chim ahcun Nihin kan duh mi Federal uknak hi a man faktuk mi a si caah thisen le nunnak in cawk a herh mi a si. Cu bantuk uknak cu nihin nan sining cun zeitin dah nan i ruah chih ngam. Thim lai lawng ah politics tuah mi cu kan ram nih kan herh hna lo. sa le ral lak ah mipi lei ah hmai asa ngam mi minung hi kan ram nih aherh mi a si.

Zei ruang ah dah ralkap uknak kan phak, a ho ruang ahdah a si ti bantuk ah na buai awk a si lo. kan ton cang mi buainak remh chun tu hi mi vialte kan rian a si. Nihin kan ram buainak ah biatak tein mipi he hmun khat ah a dir i thazaang peknak a chim rel mi zong a ho a si kan hngalh hna bantuk in a ho dah aa thup mi an si ti zong kan in hngalh ko hna.

A cunglei kan pa le hna rak i ruat uh, nan fa le kut in rul tlaih nan i timh mi hi nan palh lo nain a tlaih ning na kan chimh i thazaang tal cu na kan pek ve awk a si. Mipi aiawh tu ramkheel upa na si ahcun na thuh nak in rak lang cang.Ro Lian Thang

Leave a Reply