Rawl ei zia:Thiam hi Biden policy ah ai tel ve mi’Phunkhat asi cang.

Theihtlei

Joe Biden le Kamala Harris lawmhpinak ah tiah mah le tikhawh tawk in ka lawmhpi ve, Pizza, arsa, le 7/Eleven coffee in. Rawl tampi ei zonghi thikai zawtnak le zawtnak dang ngahnak a si ai tiah tlawmpal tein ka cah. Rawl ei ziathiam zonghi fim pakhat a si ve. Rawl ei ziathiam zonghi Biden te policy ah I tel ve dawh a si.

Biden le Democratic party pawl cu cattial lawng siloin thlacamnak zong in hehtiah ka ttanh hna/ka dirpi ve hna. Thla ka cam caan poah ah Biden ca ka telhchih peng. January ni 20 ca zongah tluang tein an lim khawhnak dingah hehtiah ka campiak. Atutiang cu US thimnak kongah ka saduhthah a tling ti khawh a si. Hmailei zongah a tlamtling lai I a tluang lai tiah ka zumh. Keimah lawng ka si lo, US minung million 80 leng nawn nih Biden caah thla an campiak I vote an pek. An saduhthah a tling. Pathian nih a kan dirpi/a kan umpi ti a lang. Biden cu Trump nak in tampi a ttha deuh/a tlamtling deuh ka ti ruangah ka ttanh bantuk in hmailei a rianttuannak ding lamthluan zongah a hlawhtling lai I palhnak a tlawm lai ka zumh.

Ka chim cia bang, Laimi Trump ttanhtu cheukhat cu nan hmur le nan lei a sau tuk I biachim holhrel le cattial nan I sum kho tawn lo. Biden a lamtluang ko seh ti biachim le cattial um loin Biden nih a kan uk ahcun thil ttha lo tampi a chuak lai tiah nan ttial lengmang. Mah bantuk thluachuah a um lomi bia le hla hna hi Khrihfa mi kaa in a chuah awk a si lo. A piangtharmi (hrintthan mi) le Khrihfa ttha nih cun Biden caah thla kan campiak awk a si I a lamtluang nak dingah biattha le biadawh tuk kan ttial deuh awk a si cang. Biden caah thluachuah a ummi bia le hla kan ttial awk deuh asi cang. A takte ti ahcun, thil ttha lo a chuah ahcun nanmah zong nan tuar ve ko lai/nan luat hlei lai lo.

Ka chim cia bang, Laimi hi kum 100 leng Khrihfa kan si cang nan kan biachim kan holhrel, kan ziaza le kan thinlung put, le kan thiltuahmi pawl zohtik ah tamtuk kan rak chambau. Pathian rianttuantu zong tampi kan nei ko hna I crusade le campaign zong voi tamtuk kan tuah cang ko nan kan Khrihfa nun cu zohchunh awktlak a si kho rih lo. Cucaah cun khua ka ruahmi cu phung kan I chimh le kan I cawnpiak tik zongah biafak deuh hmang cang hna u sih law kan tthangcho deuh lai ka ti, kan thlarau lei le kan vawlei lei nunnak caah. Bianem, holhdawh, I faknak, i’thangtthatnak, i chimthiamnak, I cawisannak, le I hlorhnak bia pawl tamtuk kan chimmi nihhin kan Khrihfa nun hi a hrawh cang tiah ka ruah. Mah bantuk bia kan chim lengmang mi pawl nih tthangchonak a kan pe lem lo tiah ka ruah.

Kan Chin miphun le kan Lairam kan dawt taktak ahcun kan lung a fim deuhnak ding caah le kan tthangcho deuhnak ding caah biafak deuh hmang in I cawnpiak cang hna u sih law a ttha lai ka ti. Bawi Jesuh le profet vialte zongnih an miphun an dawttuk caah le miphun dang zongnih thlarau lei le vawlei lei he an tthangcho khawhnak ding caah biafak taktakmi an rak hmang tawn ve ko. An mithmai zoh lo tein an sining bak tein an rak ti lengmang ve ko hna. Laimi phun rengreng hi bianem phun nih a kan tei ti lo. Laimi phungchim ka ngai belmi ahcun Rev. Hoi Cung Tum khi a bia a fak I minung mithmai a zoh lo. Laimi kan sining te bak in a chim ngamtu a si. Pakhat le pakhat mithmai zoh lawngin kan I cawnpiak peng ahcun a zeilei hmanh in kan tthangcho kho lai lo. Bawi Jesuh le profet vialte zongnih uktu ttha lo, Farasi le tlangbawi te le Judah upa pawl cu biafak pipi hmang in an sining te bak in an rak ti lengmang ve ko hna.

Atutan thimnak ah Laimi tamdeuh nih Trump nan ttanh I nan dir pimi cungah khua ka ruahmi cu Kawlram kan um lioah ralkap uknak ttha lo kuttangah kum 60 nawn kan umtik ah mahcu nan thisa chungah a lut dih I ramdang democracy uknak nan phak hnu tiang zong nan ngai rua ka ti/nan hlam rua ka ti. Aruang cu Trump uknak le cozah cu Kawlram ralkap ttha lo uknak phun bantuk deuh a si cu mu. Nannih ruahnak ahcun uktu ttha lo, uktu puarhrang, le cozah sual deuh uk ahhin sualnak a tlawm deuh lai I kan ziaza zong a ttha deuh lai I daihnak zong a um deuh lai tiphun in nan ruah/nan kalpi. Biden te cozah cu zalongnak (freedom) an duh tuk, nuhrin covo (human rights) biapi tukah an chiah, an zalen tuk I an nun a nem tuk ruangah sualnak a karh lai I buainak a tam lai tiah a ruatmi nan tam ngai.

Khrihfa mi nih cun zei bantuk cozah le uktu kuttang I kan um zongah Pathian kan biaknak ah le kan Khrihfa biaknak ah zumh awktlak tein le felfai tein kan um peng ding a si ko. Cozah nih cun biaknak kip le mi zapi ca a ttha ding in phunghrampi cu a suai ko lai I Khrihfa biaknak le cawnpiaknak he a tlak in a kal fawn lai lo. Cutik ah Khrihfa mi nih dohnak le chimrelnak nawl cu kan nei ve ko. Asinain cozah hmang in le uktu ttha lo hmang riangmang in sualnak le phunghrampi le policy pawl cu kan doh ding a si lo ka ti. Kanmah pumpak le Khrihfa bu te cio nih sualnak cu kan doh ding a si ko.

Obama cozah nih nu le nu, pa le pa umh cu onh ko hmanh sehlaw kanmah kan I umh lo kha a biapi ko I kan Khrihfa bu zongah kan onh lo ding kha a biapi mi cu a si ko. Kan fanu le kan fapa pawl kha mah tuah lo ding in fak piin kan cawnpiak hna ding a si ko. Cozah le uktu cu Khrihfa biaknak le cawnpiaknak he a tlak ning in kalter kan duhmi hi cu kan palh deuh ko. Cozah le uktu ttha lo hmang riangmang sualnak dohter cu Khrihfa kan rian a si lo. Philippines ram cu Khrihfa ram bantuk an si nan an president, Duterte a ttha lo tuk ve I ritthaisii a tawngmi poah meithal in a kahter dih hna. Mah bantuk phun uktu cu Trump a ttanhtu pawl uarci a si. Duterte thiltuah cu vawlei pumpi nih an soisel dih. Anmah rammi lila tampi zongnih an duh lo. Bible zongnih mithah le mi nunnak lak cu sual ngantuk ah a chiah.

Bawi Jesuh vawlei a rat lio zongah Judah miphun cu Rome cozah ttha lo kuttangah an rak um nan Bawi Jesuh nih Rome cozah ttha lo cu sualnak dohnak caah a hmang bel hna lo. Rome cozah tthat lonak hmanh a chim bello tikhawh a si. Amah pumpak tein sualnak cu pakhat hnu pakhat a doh ko. Zatlang nun din lonak vialte a hrawh dih. Miphun thleidannak zong amah pumpak tein a hrawh dih. Rome cozah ttha lo a hmang bel hna lo. Mah nak in biaknak lei I hruaitu, Farasi, Sadusi, le tlangbawi te tuk kha hehtiah a soisel hna I a mawtchiat hna, a doh hna. Kan Bawipa Jesuh nih sualnak a dohning hi kan I cawn ve awk a si ko. Amah balte cu profet hna bantuk in cozah ttha lo le uktu ttha lo I ziaza le thiltuah cu kan doh I kan soisel ngam a hauh caan a um len ve lai. Nihin ah Pathian rianttuantu tampi cu cozah le uktu nih thil ttha lo, sualnak, le din lonak an tuahmi hmanh kan chim ngam lo, kan soisel ngam hna lo. Khrihfa buu cu cozah caah zohchunh awktlak a si dingtuk a si I cozah cu a phunphun in a bawm dingtu le a dirkamhtu dingtuk a si lehlam.Biden le Harris cozah caah Laimi zongnih thluachuahza hampiak hna u sih law, biadawh le ngaih a nuammi le rel a nuammi ca ttialpiak hna u sih. Hmailei an lam a tluangnak ding caah thlacampiak hna u sih. Mahcu Khrihfa kan rian a si ko.Van Tum

Leave a Reply