Yangon ah lainu:Pa tak nam’Massage riantuan nu konglam’Tawi le Singapor um lainu cheukhat sining.

Theihtlei

Hnatuan timi cu a phunphun aum. Zirsang tlawng kai tu hrang cu sim’ lo sehla. Chin fala tlawng phun nei lo tu pawl an hnatuan dan kan zoh a sile a hrek in Ramdang an feh, a hrek in Nulepa cawm tu ttha an neih le Innah an um ve men, a hrek cu Phunhra onglo Nursing kaih theih nak a um ruangah Nursing an kai, a hrek cu Bible tlawng an kai ih tambik cu Singapore ah mi hnen-um ding in an feh. Tuttum ah Yangon ih Massage hnatuan tu thawn kan tongawk ih kam hnit kam khat kan biak-aw..

” Na Nulepa tek an dam lai maw .. Ule nau pawl tek ” tin ka sut ih ” an dam.. si nan, Ka pa cu an cancan a naa ringring.. paisa ngah ding in hna tampi khal a tuan thei lo, Ka Nu nih hangnah hangrah pawl zuar in kan nung.. Nau le pahnit le tlawng kai.. Kan har tuk lawmmam ih Yangon khawpi ah hnatuan sehla .. tiin ” tin i sawn.

Chin mi tampi cu phunhra ong lole Singapore an feh ttheh.. Singapore feh ding tek na tum lo maw ” tiin thu ka sut lala ih “ka tum dah ve ko.. sinan Ka Cuap ah TB nat tuar dahnak hmaphe aum ih ka feh thei lo.. feh sehla ttha lawlaw ko nan si.. Inn tlun ding le zianghman tuan theih nak aum lo.. hmaisa bik ah Dawr ka zuar.. dawr zuar cu ting 1 ihsin 150 te lawng si tikah ka cawm thei hai lo.. Mon ram lamih ra ka rualnu pakhat in Massage ah kan tuan ke i ti ih Massage cu ka tuan.” tiah i sawn ve.

Paisa ngah dan lam tek ” tin ka sut lala ih ” Paisa lampang cu kan mah laksa cu Pakhat kan hmet le Section 1 ah Thawng 1500 kan ngah ve ko.. Nikhat ah mal bik 5 ihsin 10 tiang ka hmet ko. Sinan, hmeh duh ih an feh si tikah ttha tein kan hmet sak le hmukphu ah 1000 ihsin thawng 10 tiang cu kan ngah ve ko.. thlakhat ahcun ting 500000 ihsin ting 1000000 ( ting hra ) tiang cu kan ngah ve. ” tiah i sawn ve lala.

Chinmi ah Massage tuan tu an mal kan ti men ke… Massage tuan le a san um lo pipi taksa pawl lampang an tuar ttheu tivek in a rel mi tek ….cun, Massage na tuan tikah na ningzak phahphah ko maw ” tiin ka sut sal ih ” hmaisa ahcun ka ningzak ve ko.. Sinan, Hotel pi ih hnatuan cu thianghlim ten hnatuan a theih ko.. Massage cu Oil ih hmeh ding maw , Oil hman lo taksa hmet menmen khal an um.. Oil ih hmeh cu mipa taklawng ih a zahmawh te lawng kan khuhsak .. Sual duh nunau hrangah kha vek ah an sual ko ding..

kei khal Hotel sisi.. Zuuri paisa nei lo tivek a ra mal.. Boss deuhdeuh an ra …. dungta lam ahcun ka ningzak lamlam lo… Massage tuan ruangih taksa pawl ngah .. taksa him lo tivek a um lo.. taktak in cu hnatuan pakhat a si.. dawr nei tu le hnatuan upa tampi a um ko si.. kha vek san um lo ih thua tuar tivek a um lo.. kan mah thinlung si a thupi …

minung cu sual ka duh tile Nu le pa tangsung rori in tla an sual thotho… Minei nung deuh pawl cu Beer , zuu an in tikah hmet an duh ngaingai…an Nupi pawl in le an hmet thei lo… cu ruangah Massage hnatuan timi a um nak si…. kei cu Hnatuan pakhat ah ka ruat men ” tiin i sawn ve.

Na NulePa tek paisa na kuat thei ko maw ” tiah ka sut lala …” kuat ee.. thlakhat ah ting 300000 ihsun ting 500000 tiang cu ka kuat ttheu ve ko..” i ti lala si.

Na nuamawk ko maw ” ti ah ka sut lala ih ..” a nuam ko si… tlawng phun nei lo pi ting 500000 ngah timi cu hivek hnatuan lawng um ko si.. Paisa tete tla kei mah tein Bank ah thlakhat ah cu ziah tivek ka ret ve ko… neta le ka tuan thei lo ding ruangah si… Paisa ka khol mi pawl a tam le Khua ah ka tlung ding ih hnatuan fate pakhat tal tuan ka tum ‘ tiah i sawn.Ka lungawi tuk maw… , Ka lungawi tuk ve… tiah ka biak hnu cu ka tlung ve.

Leave a Reply