US President thimnak tluk tein a biapi mi cu Supreme Court Justice ah mi zeidah an thim lai timi hi a si. Liberal maw an si lai, Conservative dah ti a si. President Donald cu khrihfa a si le si lo ah ka buai lo, a pianthar le thar lo zongah ka buai fawn lo, a biachim a holh rel kong zongah ka buai hlei lo. Khrihfa kan caah a biapi mi cu zeitluk in US um khrihfa hna a dirkamh timi tu hi biapi bik in ka zoh bikmi a si. Obama chan ah zumtu minung tam ial tazacuai an tong, thong an thlak hna, phaisa tampi an liamter hna. Asinain President Donald Trump chan ah khrihfa tazacuai le namneh kan thei lem ti lo.

President Donald Trump nih a biakam bantuk tein election lai te ah khrihfa zumhnak a dirkamhtu, Amy Coney Barret cu Supreme Court Justice ah a thim i, senate nih an fehter hnu ah Supreme court ah riantuan a thawk colh. Riantuan a thawk tlawmpal ah Supreme Court an biachahnak cu a khupthal a leh colh ko. Covid-19 ruangah khrihfa biakinn tampi khar a si. A cheu khrihfa biakinn ah milu rikhiah in pumhnak onh a si. Asinain night club, bar, zudawr, Naked club le casino tampi onmi a um thiamthiam. Liberal pawl caah cun Covid-19 hi khrihfa pawl renghnak caah caan tha le hriamnam tha bik ah a rak hmangmi zong an um ve lai tiah ka ruah. US state vialte lak ah a Liberal bikmi state cu California le New York state an si.

President Donald Trump nih Conservative Judge Amy Coney Barrett Supreme Court i a chiah hlan ah khan, California le Nevada state i a ummi Church cheukhat cu biakinn ah pumhnak nawl an onh hna lo caah tazacuainak a chuak i biaceih ding in Supreme Court an phan. Supreme Court ah an bia an ceih piak hna i, Supreme Court Chief justice John Robert nih Liberal lei i vote a thlak caah khrihfa pawl cu vote 5-4 in an sung i an biakinn an khar ter hna. Asinain President Donald Trump nih khrihfa dirkamhtu, Amy Coney Barrett Supreme Court i a chiah hnu ah New York state ramukbawi, Governor Cuomo nih khrihfa biakinn cheukhat cu minung 10-25 tiang lawng pumhnak nawl a pek hna caah khrihfa cheukhat an lungtling lo i tazacuainak a chuak i, Supreme Court an phan.

November 26 ah khan Supreme Court nih biaceihnak cu an tuah i, 5-4 in khrifa pawl cu teinak an pek hna. Mah teinak an co khawhmi cu Amy Barrett ruangah a si ti fiang tein a lang. Amy Coney Barrett Supreme Court a phak hlan i bia an rak chiahmi cu a thar in a khupthal an leh than. Cucaah Supreme Court ah khrihfa a dirkamhtu Conservative an tam deuh cang caah khrihfa hna zalonnak caah thinphan tuk ding a si ti lo. President thimnak tuah hlan deuh ah Supreme Court i khrihfa a dirkamhtu Amy Coney Barrett nih thutdan a comi hi Pathian khuakhan a si tiah ka zumh. President Donald Trump cu khrihfa hna a dirkamh bikmi, US President pakhat in tuanbia ah a tang zungzal dingmi a si. Ref:Salailairamthang

Relchap a duh mi caah:President Trump nih a lungtlin lonak States ah Vote rel thannak a tuah ter hna. Georgia State ah Vote rel thannak a tuahter hna i; Joe Biden nih teinak a hmuh than. President Trump nih Wisconsin State zong Vote rel than dingin ati hna. Nain, Vote relnak tuah asi rih loh.

President Trump nih Vote rel thannak a tuahnak ruang a phuan.Vote rel thannak hi Election Commission palhnak kawl asi loh. Vote pek awk asi mi hna Vote kawl asi/ A hmanmi Vote kawl asi” tiin Trump nih Twitter in a langhter. Wisconsin State ah a hmanmi Vote tampi ka hmuh cang ti zong a chim.Wisconsin State Vote rel thannak kong cu December 1 ah aa fiang lai ti zong a chim chap.

Relchap ko:America cu vawleicung ah a zalen (freedom) bikmi ram asi. Innchungkhar hrit-hruainak kongah na daithlaan ii, chawva le rian kha abiapi tuk ah na chiah sual ahcun, chungkhar ah nu le va, fanu le fapa he, i thlau viar a fawi taktakmi ram asi.

US ah Laimi kan umnak a sau rih lo. Nizan nai lawng asi rih nain: chungkhar ah nu le va, pa le fa, nu le fa — ai thlaumi an um pah ngai cang. Thlau kan ti tikah, a minung in tlau khi asi lo; an thinlungput a rawk tukmi le an nun ziaza a rawk tukmi kha, chim duhmi asi. A zalen bikmi US ram ahhin, kan innchungkhar cio kan i vem thiam ngaingai a hau.Hmangthlak hi ka rak tar sawhsawh mi asi hlei ah’Pathian bia ah lut cang hna u sihlaw tizong sawmh kan duh hna.

Thawngdang:President Trump nih sunghkhan a duh rih lo. A nun chungah Biden nih a ka tei ti hi chim aa tim lo ti a fiang. President an i cuh tikah November 3 zan khin cun result a fiang cang.A sungmi nih a teitu kha phone an chonh i ka sung. Na ka tei caah kan lawmh pi. Kan hruai tiah a ti tawn. Asinain Trump le Biden zawn ahcun aa phun dang. Result zong November 3 zan ah a chuak kho lo; vote thlakning a hmaan lo tuk caah Trump zong sungh a khaang kho lo. Na ka tei ti zong a chim duh lo; conglawmh bia zong a chim duh lo. Sau ngai a rauh hnu state zeimawzat nih Biden tei in fehternak an vun tuah thluahmah cang ca le hruaitu thlennak le Inn Raang chuah le luhnak caan a naih chin lengmang cang caah mipi le ram zawnruah ah Trump nih a kianh.

Hitihin a tial: “Official tein nawlngaihnak thlennak tuah ding in ka riantuantu pawl cu Biden team sinah theihter ding in nawl ka pek cang hna” tiah Trump nih a tial.Sungh a khan a si hrim lo. Sungh cu a cohlang kho lo nain vote ning in kal a hauh cang caah caan karlak cu a lung a thumh bia tu khi a si. Asinain Trump a pehmi cu “thil hmaan taktak kan theih hlan cu kan doh lai i kan tei hrim lai” tiah a tial chih.

January 20 tiang ah Trump team leiin zeihmanh tuah khawhmi a um lo ahcun Biden cu US president a si cang lai. Inn Raang a chuah hnu zong in a legal team le a support tu hna bawm in an fight peng lai tiah ka zumh.Cun Congress i House le Senate zong hi Democrats nih majority tlaih dawh an si. Tuan deuh zong ah khan House cu Democrats majority an si i, atu zong an si than. Senate hi tu lio an dirhmun ahcun 50-48 an si.

Republican majority a si, nain Januar 5 ah Georgia ah senate thutnak pahnih cuhnak a um lai. Republican nih a pahnih in an tlaih i Democrats pahnih nih an cuh hna. D nih a pahnih in an lak ahcun 50-50 veve an si lai.An vote aa tluk poah ah VP Kamala Haris nih a hruai hna lai caah 50-51 in D hoih in vote a tlu lengmang lai. Cucaah atu hi Republican upa lungre a thei. Fak taktak in an i cuh lio si.

D lei nih tangka a tomtom in an vorh chin lengmang ti si. D hi inn pathum ning in hruaitu an si ahcun conservative pawl cu hngawng lengmang an si ko lai.Cun Biden zong hi ruahnak leng in a tha deuh kho men. Obama he in kan zoh ti lengmang tikah a thatnak hmuh khawh a rak si lo. Asinain riantuantu upa pawl a vun thimmi hna hi ruah ding tete an um.

Secretary of state a thimmi kha Jew mipa Antony Blinken a si. Tuan deuh ah khan Obama nih minak nu Susan Rice kha secretary of state caah a halpiak. A cohlanpiak lo. Cun khatlei in Congress nungak pawl a hleiin Palestinian nu Rashida Tlaib hna kha cu a zai tuk. Jew miphun a thimmi kha a lungtling lo tuk. Ruah awk a ummi cu Biden hi Obama a si lo ti hi a vun lang pah tiah ka ruah.

A fanu pasal hi Jew miphun a si fawn. Asinain Ivanka Trump khi cu a pasal zumhnak aa hrawm i, Biden fanu tu cu a pasal zumhnak aa hrawm lo. Israel ram caah cun a tha lai ka zumh.Biden a si ve caah Biden cozah a si cang lai i zoh awk cu a um len ve te kho men. Amah tu cu Trump he cun ram chung a siah ram leng a siah an policy an i lo lai lo. A hleiin ramleng kong