Donald Trump: American Hrambunh Company Pakhat Nih Covid-19 Vaccine Cu A Rauh Hlan Ah An Serchuah Khawh Cang Lai
==========================

American ramchung General Election 2020 thimnak November 3, hlan ah Covid-19 Vaccine a ngah khawh cang lai, tiah President Donald Trump nih Nili ni ah a chim. Hihi White House chung ngamdamnak lei ruah dam ning bantukin a chim hi a si. Coronavirus humhimnak caah vaccine sii-ai an serchuah dingmi cu tukum dih hlan ah a ngah khawh le ngah khawh lo theih duh ah thawngzamh pawl nih biahalnak an tuahnak ah President Donald Trump nih November 3, 2020 hlan ah a ngah khawh cang lai, tiah a ruahnak kong cu a chim.

Coronavirus kong ah chawlehthalnak lei dirter dih an si caah American Business a dir lio ah hin President Donald Trump nih Term hnihnak peh than khawhnak ding lam an kawl cuahmah ve. Hi pulrai raungah American ramchung percentage in tuak ahcun nikhat ah minung 1000 leng an thi lio ah sianginn hna on than a si tikah President Donald Trump zong nih a zuam cuahmah lio a si tiah an chim.

Coronavirus Vaccine kong he pehtlaih in atlawm bik sii-ai phun khat cu a ngah ko lai, hi sii-ai a serchuah laimi zong tu kum dih hlan ah hman khawh a si lainak le American ramchung pulrai zawtnak khamhnak a herhnak kong zong Dr. Anthony Fauci nih Nithum ni ah thawngzamh pawl nih biahalnak an tuah lio ah a chim ve hna. Hi Vaccine serchuahtu ding in a zuammi hna chungin American ramchung hrambunh a simi Moderna Inc Company cu Tuluk cozah he a pehtlai le pehtlai lo, Cun, computer file pawl cu Hacker pawl nih an hack le hack lo zong American humhimnak lei chekhlaitu pawl nih thatein zohfelnak an tuah tiah thawngzamh sinah an chim. Tuluk cozah nih American ram sinin Vaccine pawl fir a timh le timh lo fiantein chimh khawh a si lo nain a si khomi zong a si tiah, President Trump nih a chim.