Laimi:Buai tihlah uh’Trump nih Biden President sinak a pek cang.

World News

US president thimnak kong ah Laimi thinlung a ba ngai ti a lang ngai. Nihchuak zong a si pah. Social media ah fawite le duhchung in chim le tial khawh a si le mi zei paoh nih kan tial/ chim cio ve, kanmah diriamhnak sawh khin. Conspiracy theories hrawng khin…

Politics​ hna, economics tibantuk khuasaktintuk le vawleicung kong hna biatak tein mi sin chimrel duh ve cun 101 tel cawn ta hrim a herh ko. Evangelist cheukhat nih Bible sianginn kai a hau lo an ti bantuk khin ruah awk a ttha lo. Chinram College/ University ah kum khatnak tel hi Philosophy semester 1-2 an cawn hau ti ka ruah bantuk khi a si.

US President thimnak kong ah zumtu hna lungre theih ding a si lo, politics kan theih tuk lem lo zong ah. Zei ca tiah Pathian nih siangpahrang cu a thim i a thlak ko hna. Cu bantuk cun uktu zong a tuah khawh ko. Asinain sullam ngei loin zeihmanh A tuahmi a um lo. Cu thil A tuahtu nakin a tuahmi thil asiloah minung pumpak ah ai hngatchanmi, minung ai bochanmi, minung ah a ttangmi si hi ttih a nungmi a sideuh khawh caah i check than a hau kho men.

Kei zong Pathian bia thukdeuh theih ka duh caah Bible sianginn Part Time in ka kai. Chim duhmi cu vawlei thil sining le fimnak zong hi cawn ve lo ahcun Expert phun, commentator phun in chim le ttial, zumhning rumro in kalpi awk a ttha lo. Pathian Bia cawn ta loin Evan vah he ai lo. Na ca le na bia a ngaitu zangfak an si. Thluak ronh khi a si ko.

Minung thinlung hi nawlbia, phung (law) le hruai/uktu nih thlen khawh a si ahcun vawlei hi a dai lai, ai rem ko lai. Cucu a si lo. Pumpak cung ah ai hngat. Zeibantuk Pastor ttha hmanh ngei law nan Khrifabu ah sualnak a um lo na ti kho lai lo. Cu bantuk cun vawlei zong a si ve, sualnak in a khatmi vawlei ah nangmah le na innchungkhar kha biapi cu nan si ko.

Zumtu dirhmun in Trump kan ttanh ti tikah hin sualnak hi zeitluk a doh hmanh ah a tuahmi sualnak dang a um lai lo kan ti kho lo. Cun amah hi US president a si peng lai lo, i amah chan ah Jesus zong a ra tthan lai lo. The Show Must Go On an ti bantuk in a hmun ding cu Zumhnak, Ruahchannak le Dawtnak tu hi an si. Chim duhmi cu Pathian nih Trump a hman tiah kan ruah a si ahcun Pathian nih a herh taktak tikah cun Joe Biden zong, asiloah ahopaoh a hman tthiam ko hna lai, Saul in Paul an thlen khawh ko hna.

Nan lung dam cang seh, Trump nih Joe Biden ttha tein uknak a chanh i january 20, president biakamnak zong ah a telpi i Joe Biden nih Trump tazacuai lo in luatnak a pek i American nih Vawleipi a ttha lei ah a hruai khawh nak hnga tu hi zumtu nih fakpi in thla kan cam khawh cun a ttha tuk ko hnga. Khrih pekmi mission tu kalpi i zuam u sih.
Aa

Leave a Reply