US Supreme Court ah hin fawitebai in phak khawh a si lo. Zaran tazacuainak cu peng biaceihnak zung in pine biaceinak zung, cun pine biaceihnak zung in US Supreme Court ti in a dotdot in kai a herh. Cucaah Trump sihne pawl zong US Supreme Court ah direct in phan khawh colh loin pine biaceih zung ah an hel peng nak a si.

Sihmanhsehlaw US Supreme Court ah direct in phak khawh colh nak lam pakhat a um. Cucu state pakhak khat i a bia ceihpiak a herh tikah a si.

Cucaah Trump nih zokzok in teinak a hmuh colh khawh nakhnga Texas pine nih Georgia, Pennsylvania, Michigan le Wisconsin pine pawl taza a cuai hna.

Cucaah US Supreme Court nih cucu a cohlan colh i Georgia, Pennsylvania, Michigan le Wisconsin pine hna kha i kilvennak ca a tialter hna i an bia cu tu zarh Nilini ah ceih a timh.

Hi Texas pine nih taza a cuainak hna hi theih a fawimite a si ko. Mee deu tbk, mee firmi tbk le mee relnak seh tbk zeihmanh aa tel lo. Sihmanhsehlaw hi taza a cuainak hna hi Democrat pawl nih an leh duh baklomi le an leh khawh bak lomi an si. Cu hna cu zeidah an si kan hun zok tti hna lai.

(A tangah ka taarmi video clip ah Texas pine Attroney General Ken Paxton nih a chimmi le ca dang cherhchan in hi ca hi ka ttial.)

(1) Electoral college clause

Article II, section 2 ahcun pine phungsertu hna (state legislatures) lawnglawng nih electoral college hna zulh awk phunglam kha an ser lai,” ti a si. Sihmanhsehlaw Georgia, Pennsylvania, Michigan le Wisconsin ahcun biaceihtu ( judges) hna le bawi pawl tu nih electoral college zulh awk phunglam kha an ser. Hihi anmah nih tuahnak nawl an ngei lo.

Cun cakuat in mee thlak a duhmi nih cun a MINTHUT he sawknak caa ttial hmasa lai. Cuticun cakuat in mee a thlakmi cung ah min a thutmi le sawknak ca ah min a thutmi kha an chek ding a si. Sihmansehlaw hi state pali ah kha bantuk in cakuatnak zung in a rami mee cung i minthut hna kha an chek hna lo. 2016 lio zong ah cakuat in a rami mee 750,000 cu an rak hlawt bal cang tiah ABC news nih a ti. Pennsylvania ah hin 2016 ah siseh, 2018 zongah siseh cakuat in a rami mee tampi an rak hlawnh bal cang.

(2) Equal Protection Clause

2000 kum thimnak (Bush v. Gore) lio ah a voi 14nk phunghram an remhmi (14th Amendment) ah “mee kilvennak phunghram aa khatmi hman cio ding” timi a um. Sihmanhsehlaw 2020 thimnak ah cun hi pine pali nih hin hawi dang pine hna he a khat lomi phung an i ser. County pakhat le pakhat zong an phung an i khat lo.

(3) Remedy in the lawsuit
Texas pine nih cun US Supreme Court kha cu pine pali ah thimmi (electors) pawl kha pine phungsertu (state legislatures) hna tu nih thimter rih ding in ca a ttial. Kum 1892 lio ah McPherson le Blacker cu president tthutnak an rak i cuh. Cu kum ah cun mee aa ningcang lomi a um caah pine pumpi ah mee tam deuh a hmumi (popular votes) kha zoh lo in mee thlaknak peng (electoral district) ah teitu a hmutu kha zoh in teitu cu an rak thim. Cu bantuk in hi tazacuainak zong hi damter ve ding in Texas pine nih Supreme Court ah ca a ttial.

A cungah ka langhtermi thil pathum hi US phunghrampi kal ning taktak cu a si. Cucaah Texas pine nih a chauhpimi hi Supreme Court ah cun teinak hmuh dawh a si ko. Atu ah cun Louisiana pine zong nih Texas leiah ttang in Georgia, Pennsylvania, Michigan le Wisconsin kha taza cuai a timh ve hna.Cucaah Trump nih teinak a hmuh dingmi hi a fiang chin thluahmah ko cang.Rev. Biak Lian Vel