Pi Chinchin Pekthang Cu Zeibantuk Nu Dah A Si? (Theih Tuk Lo Mi Pi Chinchin Kong) Nancy Dawt Chin Sung @ Lovely Nancy. A liamcia caan zeimawzat ah Chin mi chung in ram hruaitu pasal ttha tampi min chim awk le i uan awk kan ngei. Miphun i hruainak ah, biaknak lei kan zoh a si ahcun nihinni ah nu hna dirhmun cu zeimawzat cawisan a hung si cang. Asinain, ramkhel lei dirhmun zoh ahcun nu dirhmun le kutke kan tep rih lo. I chim ding le i chor ding zong kan nei lo ti khawh a si. Pa uknak tang ah amah tein riahcaw ai ronh le tupi le hmawng karlak in atu cu mipi caah rianttuan ding ah mipi ai-awh ding ah tlang pangpar a rak chuak cang. Cucu Pi Chinchin Pekthang hi a si. Pi Chinchin Pekthang cu mi zeibantuk nu dah a si?

1. Siangcachim a rak ttuan mi a si. Falam Basic Education High School ah primary ah sianginn ah kum nga chung cachim rian a rak ttuan bal mi a si. Fimcawnnak thazaang a pekmi nu a si. 2. Nyein (Shalom) Foundation ah kum hra: Nyein tiah auh mi cu NGO (cozah a si lo mi bu) a si. Abik in ram daihnak kha hmaithlak in rian a ttuan mi bu an si. Cu ah cun kum 10 chung tlangcungmi hriamtlai le ralkap cozah bia chawnhnak ah biatak tein a rak ttuan mi a si. Daihnak a duh mi nu a si.

3. Thinlunglei damlonak thlop [trauma healing] a thiam. Tlangcungmi umnak hmunhma ah ramchung ral biatak tein a rak thawh lio ah, pumsa in hliamhma a tuar mi an um bantuk in thluak lei (thinlung) damlonak a ngei mi zong an um. Cu ve bantuk in ral a tu mi ralkap chung lila ah cu bantuk cu an um ve. Mah bantuk in thinlung lei/thluak damlonak a ngei mi hi tlangcungmi hna sin ah kum 10 siseh Nargis lio ah kum 3 siseh thluak lei damlonak hi a rak thlop mi nu a si.

4. Daidim Par Women Group dirhtu a si. Kum 2000 lio ah nu hna dirkamh ding le nu dirhmun sersiam nakding ah Falam khua ah Daidim Par ti mi nu lei zohkhenh tthithruainak bu a rak dirh hmasa biktu a si. Ahmasa tein nu bawmhchanh le dirkamh hi a rak i hruhpi mi thil a si. 5. NBF ah director a ttuan. Tlangcung ramkhel party 21 fonh mi Nationalities Brotherhood Federation (NBF) ah director a ttuan cuahmah mi nu a si. Tlangcung ramkhel party 21 a tthihruai khotu nu a si.

6. Ram caah ai pumpe mi nu: Kum 2014 ah MRTV nih Kawlram chung ah ram caah ai pumpe mi nu minung 20 an thim mi hna lak ah ai telmi Nu a si. 7. CNF ah Ruahnak Petu: Chin National Front (CNF) le cozah remdaihnak cabuai cung biaruahnak an thok in nihin ni tiang CNF ah ruahnak petu a si. Cucaah, hriamnam in miphun dothlennak lei zongah hmuhton a ngei bak mi nu a si.

8. Chinchin Pekthang Club: Kum 2015 ah Falam Baptist Church Youth Fellowship hawikomhnak ah Chinchin Pekthang Club cu rak thok a si. Zanglek lei lentecelh hi a huam ngai mi le thazaang a pe bak mi nu a si. 9. A huam bik mi sport cu tennis tuk: Miding fel mi thinlungttha a si pinah a herhnak te lawngah a holh mi zong a si. Cu lawng hlah sport lei ahcun tennis tuk hi a huam bak mi le a thiam zong a thiam mi a si.

2015 Thantlang peng thimnak ah mee a thla kho [mee thlak ding ah kumtling] minung 33,231 lak ah pa hi 16245 an si i, nu hi 16986 an rak si. Pa mee a thla kho mi nakin nu mee a thla kho mi kan tam deuh. Chim duh mi cu nu nih fimkhur tein mee kan thlak (MP kan thim) ahcun kan ram caah thlennak lianngan a chuahpitu ding kan si. Nu kan mee hi biakhiahnak pe khotu a si. Cucaah nu zong nih nihin Lainu a dirhmun hi felfai tein kan zoh i, cawithlir a hau mi kha biatak tein thazaang kan pek caan a si cang.

Cu caah kan hawinu kan chungkhatnu kan rianttuantti hawinu, fa pahnih a ngei ve mi nu, amah tein a thingphurh sei ai bei mi nu amah tein a riahcaw ai bei mi nu, thla kua chung nau a rak pawi ve mi nu… An ruahnak tikhur ral pet lo, nu bia in bia tlu hlah darkhuang sumsel bang cumh len awk tiin nu hna cu Lai phungthluk nih hnon kan rak si. Atu cu nu vialte kan nganfahnak le kan retheihnak vialte a kan phruhpi ding le nu hna caah phung an thluk mi a tunglettu ding hi kannih nu nih vote kan pek hrimhrim awk a si.

Nu na si ahcun Pi Chinchin Pekthang rak vote hrimhrim. Chin ramkulh hluttaw ah nu hna aiawhtu ding ah Pi Chinchin Pekthang rak vote hrimhrim. Chin ramkhulh hluttaw ah nu kan aw a chuah khawh nakding ah Pi Chinchin Pekthang rak vote hrimhrim. Credit: Nancy Dawt Chin Sung