Pu No Than Kap Nih A Khualtlawnnak Kong A Phuan Than Cang

Chin News

Zuk: T-L (Tlangzar le Leilet) karlak motor zin ṭhatnak a si hi. Tar (kattaza) sim lo lungto phahnak hman a um lo, hmun hrekkhat ah a bek tuk, motor a feh thei lo ih mi 7 laiin a dungin in tulsak. Khawte Motor zin ṭhabik an ti mi Saek-Ticirh Zin ka feh ih, Kattaza-Leilung-Lungto tin cawhpawlh celcel in Saphai ṭial in a ṭial. Zin hminah “Saphai-Zin” tin ka sak hngehnge! Tlairawn hrut: Tlauhmun-Rallang-Lianduh-Khawsum le Sim hrut: S.Dihai tiang ka fehnakcin khal hmun hrekkhat cu hi hnakin an se deuh. An lilawn dawn mi khal Lilawn vek lilawn lo vek tlak phanum khal a um. Hrianghnang le Rulbu khua fehnak zin siatdan tla cu. hmnnn, Hivek zin Leibek le zin Sia men hi Chin miphun covo a si maw? Si lamlam hlah! ~Independence kan ngahnak san khat a kim thlangih Yangon, Mandalay vek talin zinpi neih hi kan covo hrimhrim a si. KAN COVO LAKSAL A CU! ZIN SIAT hi paisa um lo ruangah a si maw? Zoh hnik sehla!

PAISA neih mi: Chin state in 2016 hnu kum tin paisa ngah mi: 2016-2017: 132.45 billion MMK, 2017-2018: 142.11 billion MMK, 2018-2019: 144.11 billion MMK, 2019-2020: 260 billion MMK (US$170.75 million) a si.

Tui Kum lawng Budget hi 2018-2019 budget hnakin MMK 220 billion ($144.45 million) a pung ih a hrek cu Central a hrek cu Ramkulh ta a si. Nikum hnakin US$144 million in a pun ruangah US$170 million a si).

A liam cia Kum pawl tello, tui Kum lawng Budget ah: MMK 51.39 billion ($33.75 million) cu Lamzin hrangah a si. A tam nasa. Tui Cozah in Chinram Khawte pannak zaten motor zin kan lai thluh an ti nan a hmin men a siih fur-ṭhal zawh theih an um lo tluk a si. Falam peng lawng a silo, peng dang khal Hivek thotho.

KHAWTE LAM DINHMUN, MMK 23.55 billion ($15.47 million) cu Khawte lam thansonak ah a si. Khawte lam mipi in mai khua hrang tidai, lilawn, hall saknak, Lamzin hrang paisa dil rero tul loin Cozah in a tuah sak tengteng dingmi a si. Paisa sanction cia thluh a si. Khawte hall nei lo an tam lai.

MMK 18.34 billion ($12.04 million) cu ramri tluan hrang le hnam fate thansonak (ethnic development) tin retmi hrangah a si. Himi paisa hi Mizoram, India thawn ramri tluan ih um khuapawl hrang bik ah a si. Ramri tluan um khua mipi ih dil rero tul loin, Cozah in a tuah sak thluh ding mi ding lai Cozah hnatuan hrimhrim a si. ~Khawte hrang paisa hi a tam nasa. Himi paisa hmangin tuan suah mi Falam peng ah ka hawl rero ih Van ah an rak kai hlo thluh a si hmang, ka hmu ve lo. Ka mit a tha lo tla a si thei.

MMK 8.48 billion ($5.47 million) cu Khawpi thansonak hrangah a si. Falam khua telin Chinram khawpi 9 hrang hman dingmi a si. Cozah cun Hipawl hi a tuahsak tengteng a tul. MMK 7.31 billion ($4.8 million) cu Electric tuahnak hrangah a si.  HMINSIN: Hrilawk ding ni puan hlan (July 1, 2020) hlan Kum 4-5 sung rori ah, khuaram hrangah Chinram NLD Cozah in paisa a hman thluh ih a ṭuan thluh a ṭul.

HMANSEH, Hrilawk naih July, 2020 hnu lawngah khuaram hrangah an ṭuan tum fang a si ahcun, mai ṭuanvo neh lo, vote hawlnak men ih Ram mipi paisa hmang ti theih a si. Mipi in hril tlinsal tlak an si maw? (India tivek ramdang tla ahcun hrilawk naih ah khuaram thansonak Lamzin laih, hall sak, tivek hi vote hawlnak ih hman peng theih a si ruangah kham a si). Credit: Pu No Than Kap

Leave a Reply