Salai Lairamthang Bialehnak: Laimi Nih Bochan Mi Pakhat Nih Kapkhat Lawngin Ca Na Tialmi Nih

Chin News

Lengchin Lungum: Ziah nang kan laimi ah a langhlat zong i kan in bochan mi pa pakhat nih kapkhat lawng rumro in ca na van tial tik ah hin ka khuaruah a harngaingai si. Sa Sa hi kan tluk lai tiah an sawisel lo i, kan tluk lailo ti zongah an sawisel mi a si fawn lo. Miphun dirkamhnak kong ah Chin mi taktak a si mi nih cun a tu hi Chin miphun hi a lamkip in dirpi caan dahkaw a si cu tikhi a si.

Saya Peter Ngunza Cung hrihmi ZOOM biaruahnak ah Dr Sa Sa hruainak in  tuahmi Talk Show ah Political reform kong an ceih tung lo – TIMES OF CHIN  NEWS

Intervew an tuah mi i a bia chim mi vialte kha Chinram ca i rian a ttuan mi CNF/A min cu a chim lo nain mah hna nih an rianttuannak he pehtlai hoih tiang in dahkaw a sawisel hna kha mah cucu a theitu nangmah bak na si ko cu mu! A tubantuk i ka van coment tik ah khin ninghngal ti zong ah na ka ti khawh men i, zei theilo ti zong ah na ka ti khawh men mi a si. Sihmanhselaw mah le miphun a lam kip in dirpi chimlo in adirpitu a sawiseltu pawl khi kei zei a si lo, le cathiamlo ca hmanh ah santlai lo, miphun zuartu le miphun thangchiattu an si ti khi a si ko.

Sa Sa kong cu mi tampi nih an tial cang i, a hram taktakj kan theih tunglo ahcun faaktuk palia in kan aukanh dingah ka ruat lemloh hih,kei nih ka dirkamhnak pakhat cu Chinram chung an khua i vanlong tumhmun a tuah cuahmah mi le miphundang i bochan in chaw a leh cuahmah mi le an khua pawngkam ah NGO tete nih si le ai an peek mi a lak in a phawt mi hna ruang ah khin ka upat ve,a ruang cu Chin mi chungah a ttuan ve ko caah tiah ka hei ruah ko.

Sihmanhselaw a tubantuk in An thihtiang hmanh an tluk lai lo hei tibantuk hna midang nih an tial ah khin cun a nih zong nih Chinram caah a nunnak thap in le miphun dang sinah “CHJIN”ka si tilanghternak kong he pehtlai in le kan miphun dirpi kan si tinak le a herh tinak caah CNLD an dirkamhtu khi a thih tiang zong a tluk ve hna lai lo tiah ka hmuh ning a si ve. Minung cu mah le hmuh ning le mah le kalpi ning cu a um, asinain paatkhat rumro in ttanh mi ttanhtuk le namhmi namhtuk ti zong khi a dik thlu lo, zeidah a hram zeidah a dong ti kan tuak chih bak a herh mi a si. Khah ka bia a sau, kai lawm.

Salai Lairamthang nih a ttialmi: Ruah Chuk Cho. Ka tial lai lo tiah ka sum chih nain FB nan catial mi nih tial lo awk tha loin a ka nam tuah. Miphun min te nan hman caah soisel hi kan I thlachiat ngai. Miphun kan daw, miphun kan ttanh nan ti nain nanmah ruahning le duhning in a si ve lomi, nan pomning a pom ve lomi, nan uarmi party a uar ve lomi, nan ttanhmi party a ttanh ve lomi nan miphun hawi lila cu mai sam in nan sam hna, zoh awk tlak loin nan soisel i nan thangchiat hna. Cucu maw miphun dawt? cucu maw miphun tthanh?

Democracy ahcun kan ikhat kho zungzal lai lo. Kan I dan khawhnak kha democracy phung a si kha philh lo ding a si. Policy kongah pasal duh tawk in isoisel ding a si. Asinain nanmah he nan I khah lo cang ka in pumpak min thlir rumro in thangchiat le soisel nan hmanmi nih nanmah party lila caah chiatnak theipar a chuahpi lai zong nan ruah chih ding a si.

Dr.Sa Sa cu Chin miphun arfi bantuk in kan zohthla mi pakhat a si. A tuahsernak in miphun le ram a dawmi a si. Kanmah cio bantuk in ramdang ah nuam tein a fimthiamnak hmang in a um kho vemi a si. Asinain ram a dawt caah fahnak, harsatnak a thim, sifak mi harsa hna he ti le rawl a hrawm timi a si. Cucaah Chinram chung khuate bik, sifak bik le a harsa bik khuate ah khuasak a thim. Amah tluk miphun dawmi le zawnruat mi hi Laimi chungah mi tlawmte lawng an si lai.

Laitlang I facang a har lio, mautam ruangah I Laitlang kan har lio caan, Hakha a cimh lio caan ah a si khawh chung in kan miphun chanhchuah tu dingah fek tein a dirmi pasaltha a si. NLD party I aluh le cangka maisam in nan sam, sum phomh in nan phomh. Zoh awk tlak lo le rel awk tlak loin nan soisel. Nanmah party va siseh law nan lu cungah nan laamter lai a fiang tukmi a si. Mah party a si ve lomi poah, a lungfim rih lo, a hrut tuk, a molh tuk, sibawi nih politic tuah phung a si lo, Laimi sifaknak ramdang ah a zuar, Kawl sal si a duh, mah miphun nak in miphundang a uar tiah puh lo le puh lo zong kan puh viar. A ngaingai tiah cun mah bantuk a chimmi le a tialmi hi ram le mphun caah cite tun khat hmanh a chuah kho lomi ram caah rasen tun khat hlut hmanh a siang lomi lawngte an rak si.

Dr.Lian Hmung Sakhong nih 2020 Thantlang CND lio a biachim mi ah Daw Aung San Suu Kyi cungah a lunglawmhnak a thangthatnak a rak chimmi ruangah a phunphun in soiselnak nan rak tuah thiamthiam. Nanmah party duhning lawng in biachim seh, a herh ahcun Daw Suu zong soisel seh. Boyoke Aung San tiang zong soisel seh ti khi nan duh. Dr.Lian Hmung Sakhong cu a luancia kum 32 lio in miphun caah nunnak thap in miphun caah hmawng a tthiam cangmi Chin pasaltha a si.

Nizan I Dr. LIan Hmung Sakhong le tuchun hi Dr.Lian Hmung Sakhong kha a khatmi te an si ko. Politic timi cu icelh thiam a hau. Fimkhur a hau. Hruhru hranghrang I politic tuah cu mah le mah suicide I tuah bantuk a si. Dr.Lian Hmung Sakhong thiamthiam nih Interview pakhat ah “Daw Aung San Suu Kyi kan ttanh si lo, amah tu nih a kan ttanh” tiah a chim than I, a herh lo tiang in soiselnak kan tuah than. Kanmah party duhning hoih in a chim lomi, a tial lomi le a dir lomi poah cu kan huat colh hna. Mah bantuk soiselnak kan tuahmi nih mi thinlung pakhat hmanh a la kho lo. Mi mit kan kem. A thli tein dirpi le ttanpi a timmi hna hmanh an a thlite in an I zuk diam. Policy kongah duh tawk in soiselnak tuah phung a si. Asinain pumpak i soisel le I thangchiatnak nih aho ca hmanh ah thatnak a chuapi bal lo. Mah le mah tanbo in I tuk bantuk a si.

Leave a Reply