Christopher Nih Ralhrang Pawl Bia Cei Ding 29,000 A Um Ti Cang

Hmuhning

1988 Burma ram nuhrin covo le Democracy cawlcanghnak kong I arak i tel mi poh le a hlat mi poh nih cun BBC thawnghlat tu Christopher Gunness timi min cu theih dih asi. 1988 cawlcangh nak lio ah Rangoon in thawng a rak zamh, a hnu ah ramleng ah va chuak tiah Ne Win Socialist cozah nih an tthawl. Lam hla kal lo in Bangkok ah a tthu I Burma ram kong cu pehtlai te in thawng a thanh tthiamtthiam. Rangoon a rak um lio ah Burma Student movement hruaitu pawl he pehtlaih nak ttha te in arak tuah cang caah sianghleirun sianghngakchia pawl nih thaizing ah zeidah an tuah lai, cozah sin ah zeidah an hal lai ti bantuk pawl kha fiangte in a rak chim khawh lengmang. Cucaah cun a hnu ah cun zan ah BBC radio ngaih in a thaizing ah zeitindah kan cawlcangh lai timi kha coordinate a tuah tu dirhmun bantuk tiang ah a rak phan.

Naite ah khan kan hawi nu pakhat nih Christopher Gunness nih chawh le biaruah an duh caah theihternak introduce kan tuah hna lai a rem lai maw tiah a vun ka hal. Aize, Christopher rilmal I ton le biaruah duh cu rem rilmal dahhe tiah ka hei ti. Cu ticun kan vun ipehtlai.

Christopher hi BBC in ai dinh hnu ah UN department hmun kip ah rian pipa a ttuan. 2021 February thla I kawl ralhrang nih hramhram uknak lak an itimh tik ah a hlan 1988 I a min a rak than nak Burma ram kong nih a lung a vun lak tthan. Kawl ralhrang an sualnak hi kan zoh sawhsawh awk asi lo, an sual man hi mawhphurh nak an neih hrimhrim ding asi ti ah a ruah. Cu caah UK ah Myanmar Accountability Project timi bu cu UN lei experts pawl, International law lei expert pawl le ICC ah Yugoslavia ram uk tu hlun pawl bia a rak ceih tu UN Biaceih bawi ti bantuk pawl he Min Aung Hlaing le SAC ralhrang pawl zei tin dah taza kan cuai khawh hna lai timi lam an kawl.

Kan hnu zarh ah khan taza cuainak ca cu an vun thok. Chinmi nih kan tem tuar mi zong hi cu taza cuai nak ah cun telh chih ve hrimhrim a hau tiah kan ruah caah zei tin dah hma ka lak lai I rian kan ttuan tti lai ti kha kan iceih mi cu asi.

1988 in ai thok mi kawl ralhrang hna an sualnak laril kha kan vun zelh lengmang tik ah a tom a chah in a lian ngaingai. Tutan i MAH le SAC ralhrang hna an thil tuah hi a hliah vun kawl ah cun 1988 lio he khan laril bantuk in ai tlai mi asi.

International Investigative Mechanism for Myanmar IIMM tiah theih mi UN nih a dirh mi Kawl ralhrang pawl an sual nak a ngiathlai tu hna nih an kan chimh nak ah an sualnak hi taza cuai I biaceih phu an si ko tiah ruah mi case lawng te 29,000 case thong kul le thong kua tiang kan data chung ah a um cang tiah an ti. Hi vialte sualnak an tuah ko bu le ram mipi nih hacang rial in kan tuar lengmang mi hi, za remruam cang seh ti cu a ho poh nih kan saduhthah asi theu lai Salai Bawi Mang Liang.

Leave a Reply