Atulio Hakha ah COVID-19 zawtnak ngei minung 96 an um rih July 7 zaan suimilaam 7:50 tiang Hakha ah COVID-19 mizaw minung 96 sii inn ah an um rih, minung 2 an thi cang, tiah kan theih.June 10 in July 7 tiang Hakha ah minung 1015 zawtnak chek an si i cuchung ah minung 162 zawtnak an ngei.

Zawtnak a ngei mi chung in minung 2 an thi i minung 64 an dam than. Atulio sii-inn ah aa thlopbul mi minung 96 an tang rih, tiah Hakha Christian Ministers Fellowship ah Secretary a tuan lio mi Rev. Dr. Steven Lian Hup Ling nih a facebook cahmai in a langhter.Mizaw thlopbul lio mi hna cu Hakha sii-innpi ah minung 79 le Hakha Taingyin sii-inn ah minung 17 an si, tiah kan theih the hakha times.

Thawngdang NUG Cozah Cu UN Nuhrin Covo Lei Nih Cohlannak A Tuah NUG cozah cu UN nuhrin covo lei Chiarman Michelle Bachelet nih a cohlan cang,Myanmar ram buaibai nak cu nuhrin covo lei hoih in le ramchung ral sinah a ngat mi dirhmun sangah a phan tiah UN nuhrin covo lei phu nih an chim.

Myanmar rallokap lei zong in NUG cozah,tlangcung hriamtlai,mipi phu,CDM phu,lothlo phu,duhlonak langhternak le i tonnak ngei dingin nuhrin covo lai in nih ruahnak a pek hna UN nuhrin covo lei in Michelle Bachelet nih a chuahpi mi ah NUG a cozah min fangkhenh in vulei pi nih Myanmar mipi he hmunkhat ah kan dir tiah a chim fawn.

Myanmar ramah atu lio boruak in ramkhel buaibainak ruangah nuhrin covo buar in mipi 900 peng an thah hna i minung 5200 leng an tllaih hna,minung singhnih leng nih inn an chuahtaak,ralhrang nih ngandnak inn,ngandamnak riantuan hna zongah dohnak voi 240,Media 90 leng an tlaih hna i Media zung license an chuh hna.FAO nih a chim ningah minung nuai 6 nih harsaknak an ton cang i UNDP nih a tuak ningah 2022 hlanah Myanmar mipi cheukhat nih dinei awk an ngei lai lo,hriamtlaih nak in ralhrang dohnak le,tlangcung hmunhma ah mipi kahdoh,i dupnak hmun ah le biaknak inn ah hriamngan in,vanlawng in thahrum hmang in kahnak an tuah the chin post.

Thawngdang June 28 in July 2, 2021 ah tuahmi NCCYF le CNN mino Civui pi ah kan pa pakhat a si mi le NUG cozah zongah hruaitu dirhmun ah an kan dir piaktu Dr Lian Hmung Sakhong nih bia a chim mi chungin kan ttial khawh tawk le zeitindah federal army kan ser khawh lai tibantuk siseh NUG le CNF karlak hnatlaknak tuahmi hna zong a chim chih.

A chim mi cu “Tlangcung hriamtlai pawl direct in PDF ah lut dih uh an ti cucu direct in tlangcung hriamtlai pawl PDF ah an luh a si ahcun mah cucu Min Aung Hlaing kuttang i tlangcungmi ralkap va tlak he khin aa lo, ti khan cun Federal army a chuak kho lai lo.

Cu caah federal army a chuah khawhnak ding ahcun kan mah tlangcung mi hna nih kan mah le kan ram cio ah kan ram humhimnak caah ttawan kan laak lai. Kan ram kan zohkhenh lai, timi kha pakhatnak ah kan i tlaih ahau. Pahnihnak ah Kawl pawl ralkap(PDF) le tlangcung hriamtlai ifonh hnu lawngah federal army cu a chuak lai mah cucu kan i fiang tawn lo i tlangcung hriamtlai hna nih an hngahmi zong a si.

Sinain, kan nih CNF nih kan hngak maw, kan hngak lo. Zeiruangah kan hngah lo tiah cun a thei lo mi hna kha kan chimh hna lai i kan mah nih policy kan hruai lai kan ti. Cu caah NUG le CNF kha hnatlaknak(agreement) kan ngei cang.

Kha hnatlaknak kan ngeihmi kha mipi sinah kan phuang duh bal lo, a zapi te cun ka phuang lai lo nain a herhmi pakhat te ka van chim lai. Kha chungah khan bia pahnih aa tel pakhatnak ah Thein Sain cozah ah kan lung a rak tling cia mi Chinland cungah hriamtlai CNF le ralkap cozah lawng a um lai timi kan hna a rak tla. Asinain NUG sin ahcun Chin ram chungah CNF a um timi kha an hna kan tlak pi. Cun Chin ram chung a humhimtu, a zohkhenhtu dingah CNF nih ttawan kan laak kan ti.

Mah kha an lungtling i minthutmi ah aa tel. Midang tlangcung hriamtlai zong nih zeitindah federal army kan ngah khawh lai timi zong an hngalh an theih asinain Kawl pawl nih rak kan sawm hmasa hna seh timi an hngak, mah cucu kan nih CNF nih kan hngak lo.

Kan mah nih kan duhmi kha kan tuahter hna, kan duhmi an tuah ahcun kan i fonh hna lai i kan duhmi an tuah lo ahcun kan kal taak hna lai. Kan duhmi kha kan tuahter hna i an lungtling cu caah kei zong hruaitu dirhmun ka laaknak a si.” tiah a chim.