Za Sang Cinzah Revolution ah biatak tein a tho mi

admin Hmuhning

Egypt ram ah Kum 430 chung sal dirhmun in a ummi miphun, Israel miphun cu Pathian nih chanchuah a duh hna tikah hruaitu, Moses a pek hna. Chin miphun hi Kawl tang kan umnak hi 1948 in tuak ahcun Kum 73 a si cang. Kawl Ralkap uknak in kan luat khawh nak hnga ding ahcun Moses bantuk hruaitu tha kan herh.

Newin chan ah Pu Hrang Nawl a tho. Cun, a ra i 8888 uprising nih CNF CNA a hrin hna. Atu a voi 3nk “Spring Revolution” ah CDF ah an chuak.

Tutan Spring Revolution ah biatak tein a thomi, Generation Z pawl an hruaitu hna, ka zoh hna tikah, Dr Sasa in, CDF lei hruaitu vialte hi Moses bantuk an si dih.

Cucaah, Chin History ah “Spring Revolution” hi, “a hnu bik the last battle” a si lai tiah ka tuak. Teinak hmuh ding ah hruaitu ttha kan herh i, Cucu Pathian nih a kan pek cang tiah ka tuak fawn.

Pathian nih Israel miphun hna, Egypt sal in a luatter hna tikah, direct in luatnak freedom a pe hna lo. Rili sen an tan cross ta. Jericho Khuapi an kulh/hel i a tlu ta. Canaan miphun, mi nganpipi an tei hmasa hnu lawng ah, cawhnuk le khuaithliti a luannak caannan ram ah freedom a pek hna kha a si.

Cucaah, Tutan Spring Revolution, ral dohnak ahhin Mautam a tlung lai. Cucu kan tei lai. Chin State ah Ralkap station an kulh lai i, an tlu thluahmah lai. Ralkap meithal nganpipi missile tbk in doh le tuk kan tong ko lai nain, kan tei thiam lai. Cu hnu ah freedom taktak cu a ra lai.

Zei thil paoh hi Pathian nih a lak/free in a ser lo. A sermi minung vialte luatnak khawhnak ding caah a fapa Jesuh cu “sacrificed” a tuah bantuk in, Chin ram le Chin Miphun luatnak ding caahcun, tulio caan ah a nungmi Chin Miphun nih “sacrifice” kan tuah bak a hau.

Ram chung ah Mino nih an nunnak in Sacrificed an tuah. Nu le ngakchia, upa inn hngak nih anmah le si khawh ning cio in an ttang cio ve. Ramleng lei a ummi nih nafitin kan ttuanmi kawlhawlmi chung tein, Phaisa thazaang in kan bawmh ve hna a herh. Mah vialte pekchannak le harnak pinlei ahcun FREEDOM cu a um. Cucaah lungsau tein teima tein hmailei, kan Goal tung victory kan phak hlan tiang kal chin vima a herh tuk lio caan a si.