AA Le Kawl Ralkap Kahdonak Ruangah Cozah Lei Bawi Tam Ngai An Nunnak Liam

Myanmar News

AA Le Kawl Ralkap Kahdonak Ruangah Cozah Lei Bawi Tam Ngai An Nunnak Liam
===========================

Rathedaung Township Kahdohnak Ruangah Police, Lahwaka, ralkap telh in Minung 14 an thi i, minung 6 an tlaih chih hna. Rakhine ramkulh, Rathedaung peng, Setipin khua pawngah Kawl ralkap, police le Lawaka lei phu le Arakan Army hriamtlai phu kahdohnak ruangah minung 14 an thi i, minung 6 cu AA hriamtlai phu nih an tlaih bel hna, tiah thawngpang theih asi. Kawl ralkap le AA hriamtlai phu hi August 2-3, 2020 nihnih chung an i kah i, Rathedaung pengkulh, Seitipin khua le Maungdaw pengkulh Chawhvan khua karlak lam cungah an i kah hi a si, tiah theih a si.

Lahwaka Zung riantuan bawi Kyaw Zaw Khine, Yehmu 1, Do-Yehmu 1, ralkap lei bawi 1 le ralkap sawhsawh minung 10 leng an thi tiah theih a si. Cun, AA hriamtlai phu nih ralkap 6 an tlaih rih hna. Hi kahdonak ah hin ralkap le police bawmh in ralkap thazang 400 hrawng le AA hriamtlai lei in ralkap thazaang 300 hrawng an si tiah an chim. Hi kahdonak hi a ropui taktak ti khawh asi. Khaphnih Ralkap thazang 600 bak in an i kah tiah khuami pakhat a min langhter a duh lomi nih a chim.

Atu tiang thawngpang theih ning ahcun ralkap thazang zong an chap chin lengmang i, AA hriamtlai phu lei zong nih an i kahdonak hmunhma hrawng hi lam an kham i, an i doh rih ko hna, tiah an chim. U Kyaw Zaw Khine cu a hlan ah Rathedaung ah a rak um balmi a si. A pa hi pension a lak hnu ah Paletwa khuapi ah a um cang tiah theih a si. Cun, U Kyaw Zaw Khine nupi zong hi sianginn cachim (sayamah) riantuan a si i, atu tiang kahdonak an um rih ko tiah U Kyaw Zaw Khine chungkhat pawl nih an chim.

AA hriamtlai lei in thawngthanhnak an tuahmi cu Rathedaung pengkulh AHtetnan khua in nitlak lei milometer 3 a hlatnak ah hin Kawl ralkap le Police i bawmh in AA hriamtlai phu cu an doh peng ko hna tiah an langhter. Hi kahdonak ruangah ralkap a thi mi zat zong cunglei nawlngeihtu pawl thawngpang an hal ko hna nain, pehtlai khawh an si rih lo, tiah theih a si.

Leave a Reply