Mindat le Falam Peng I Kahnak Ah Ralhrang 20 Leng An Thi Chin ramkulh,Mindat peng le Falam peng chungah ralhrang rallokap le mipi ralkap kar ah nihin July 24 ah i kahnak a chuak i ralhrang rallokap lei in 20 leng an thi tiah thawngtheih a si.

Mindat nichuahlei khua pakhat ah ralhrang kuttang palek riahbuk pakhat cu tuzing zinglei ah CDF-Mindat nih an luhhnawh i an lak,ralhrang lei in 20 leng an thi.

July 20 thawk in CDF hna le ralhrang kar ah kahdaihnak a rawh caah i kahnak a chuak i CDF Mindat in minung pakhat a nunnak a liam.Nihin zanlei ah Falam pawng Falam-Hakha lamcung ah ralhrang rallokap le CNO/CNDF i kahnak a chuak tiah thawngtheih a si.Hi i kahnak ahhin hliammi le thimi zat tgeih a si rih lo the chin post.

Thawngdang Myanmar COVID-19 Kong ah UN Cawlcangh Hram a Thawk WHO, European Commission le France cozah i bawm in an serchuahmi COVID-19 runvennak sii COVAX hi Myanmar rammi hna ca ah tlamtling in hmuh khawh ding in an i zuam.Khulrang tuk in a karhmi Myanmar ramchung COVID-19 zawtnak dohnak rian ah Myanmar hrambunh UN Country Team pawl cawlcangh hram an thawk cang, tiah July 19 ah thawng an thanh.

July 17 ah Myanmar ramchung ah COVID-19 zawtnak checkmi minung 15,000 dengmang lak ah minung 550 hrawng sin ah COVID-19 zawtnak hmuh a si i, aluancia zarh hnih nakin COVID-19 zawtnak a ngeimi 7% in an karh.
Cu lawng si loin December 2020 ah India ram ah ahmasa bik an rak hmuhmi COVID-19 (Delta Variant) zawtnak phun zong Myanmar ah hmuh a hun si ve.

Myanmar ramchung peng 70 ah Stay at Home tuah a si i, July 17-25 tiang zung khar tiah SAC nih thawng a thanh ve.
UN Country Team nih ahmasa bik ah aa zuammi cu Oxygen tlamtling in hmuh khawh nakding hi a si.
Oxygen tlamtling in hmuh khawh nakding ah UN Country Team nih ramchung le ramleng i zumhtlak Oxygen sehzung pawl pehtlaih aa zuam hna.

WHO, UNICEF le a dangdang bu hna zong nih Myanmar ram ca ah COVID-19 runvennak si hmuh khawh ding in an i zuam cuahmah.Abikin, WHO, European Commission le France cozah i bawm in an serchuahmi COVID-19 runvennak sii COVAX hi Myanmar rammi hna ca ah tlamtling in hmuh khawh ding in an i zuam hna.Tu kum 2021 chung ah Myanmar rammi milu zapi chung in 20% nih COVAX an i chun kho lai, tiah UN nih timhlamhnak a ngei.

Atulio Myanmar ramchung ah COVID-19 testnak hi ni khat ah milu 12,000 in 15,000 karlak tiang lawng tuah khawh a si rih. Cucaah, test center a thar in ser a si nakhnga rian an ttuan cuahmah cang.COVID-19 zawtnak nih Myanmar rammi ngandamnak le sipuazi fak tuk in a chuahchuah lai caah ningcang thar hmang in COVID-19 hi doh a hau, tiah UN Country Team nih an langhter.Myanmar ramchung ngandamnak rianttuantu pawl zalong tein le nunhim tein rian an ttuan khawh nakhnga tawlrelpiak zong an herh,” tiah an langhter chap.