Chinram ah NLD nih PDF a dirh lai timi kong ah biafiang ngai phuan a sicang hi

Myanmar News

Chinram ah NLD nih PDF Dirh an Timh Timi kong ah Chin NLD Upa Biahalnak Chin ramkulh ah NLD palai pawl nih PDF dirh an timi tiah nai hrawng bia a lenmi kong he pehtlai in Chin ramkulh NLD upa pakhat a simi Pu Jacob Thang cu The Chin Journal nih biahalnak kan ngeih i atulio Chin NLD upa pawl le an rianttuan ningcang konglam pawl tlamtling in a langhter.Biahalnak Chin NLD upa/palai pawl nih a dangte in PDF dirh an timh timi kongah Chin NLD nan dir hmun Bialehnak Chin NLD upa nih siseh, MP palai nih siseh PDF dirh ding ah timhlamhnak an ngei ballo. Ralkap uknak duh lo ruang ah humhimnak ttuanvo latu CDF rianttuannak cu Chin NLD upa si hna seh, MP palai pawl si hna seh cohlan le dir kamh a si.

Biahalnak Chinram chung hriamtlai CNF/CDF he pehtlai in rian nan tuan ti kho maw Bialehnak: Hluttaw palai nih CRPH a ser. CRPH nih NUCC a ser. NUCC nih NUG a ser. NUG le CNF cu ralkap pennak thlak ding le Federal Democracy pennak a chuah tiang hmun khat ah rianttuan tti ding in hnatlak minsen an thut cang. CNF cu NUG cozah he rian an ttuan tti bantuk in Chin Hluttaw he zong hmun khat ah rian an ttuan ti.

Committee Representing Chin State Hluttaw (CRCH) le CNF hruainak in Interim Chin National Consultative Council (ICNCC) ser a si. ICNCC in NUG ah palai (2) thlah a si i cu chung in Dr. Lian Hmung Sakhong zong Federal Union Minister rian pek a si. Cun NUG hruaimi Ministry of Defense (MoD) nih West Commend Implementing Committee (WCIC) ser ding a ti bantuk in Chin MP hruainak in WCIC ser a si. WCIC ttuanvo ngeitu le CDF hruaitu hna cu hmun khatte an rian an ttuan ti. Cu bantuk cun CNF zong CDF he hmunkhatte ah rian an ttuan tti.

Biahalnak Atu lio ramkhel kong he peh tlai in Chin NLD pawl zei rian dah nan ttuan bikmi si Bialehnak: A cunglei i ka langhter mi vialte khi Chin NLD nih a tuanmi rian a si. Chin Hluttaw palai chung ah a cawlcangmi hi Chin NLD lawngte an si. Atu lio tthithruainak CRCH, CRPH le NUG ah biatak te in thazaing chuah in rianttuan a si. CDF nih an herhmi hriamnam tlamtin nakding, IDPs bawmh chanhnak, tbk., kan miphun ca ah a herhmi chimrelnak an ngeih hnu ah bawmhchannak hmuhmi cu a tawlreltu hna i ttuanvo an lak ko. Atu lio dohthlennak caan lio ah Chin NLD rian lawng a si lo kan miphun dihlak tuanvo a si. Biaknak in siseh, zatlang bu in siseh, party kip in siseh thazang kan chuah ding rian a si.

Biahalnak Chim chap na duhmi Bialehnak: Atu lio ah Party in siseh, pumpak in siseh mah hlawknak hmuh ding ah rianttuan caan a si lo. Kan miphun ning in thazaang chuah i hmunkhatte ah riantuan tti caan a si. Fiangfai in theih lomi kong social media ah cattial ding a si lo. Ahnu ah mah le mah ningzah i thlaih a si. Bia na ka halmi cung ah ka lawm.The Chin Journal

Thawngdang June 28 in July 2, 2021 ah tuahmi NCCYF le CNN mino Civui pi ah kan pa pakhat a si mi le NUG cozah zongah hruaitu dirhmun ah an kan dir piaktu Dr Lian Hmung Sakhong nih bia a chim mi chungin kan ttial khawh tawk le zeitindah federal army kan ser khawh lai tibantuk siseh NUG le CNF karlak hnatlaknak tuahmi hna zong a chim chih.

A chim mi cu “Tlangcung hriamtlai pawl direct in PDF ah lut dih uh an ti cucu direct in tlangcung hriamtlai pawl PDF ah an luh a si ahcun mah cucu Min Aung Hlaing kuttang i tlangcungmi ralkap va tlak he khin aa lo, ti khan cun Federal army a chuak kho lai lo.

Cu caah federal army a chuah khawhnak ding ahcun kan mah tlangcung mi hna nih kan mah le kan ram cio ah kan ram humhimnak caah ttawan kan laak lai. Kan ram kan zohkhenh lai, timi kha pakhatnak ah kan i tlaih ahau. Pahnihnak ah Kawl pawl ralkap(PDF) le tlangcung hriamtlai ifonh hnu lawngah federal army cu a chuak lai mah cucu kan i fiang tawn lo i tlangcung hriamtlai hna nih an hngahmi zong a si.

Sinain, kan nih CNF nih kan hngak maw, kan hngak lo. Zeiruangah kan hngah lo tiah cun a thei lo mi hna kha kan chimh hna lai i kan mah nih policy kan hruai lai kan ti. Cu caah NUG le CNF kha hnatlaknak(agreement) kan ngei cang.

Kha hnatlaknak kan ngeihmi kha mipi sinah kan phuang duh bal lo, a zapi te cun ka phuang lai lo nain a herhmi pakhat te ka van chim lai. Kha chungah khan bia pahnih aa tel pakhatnak ah Thein Sain cozah ah kan lung a rak tling cia mi Chinland cungah hriamtlai CNF le ralkap cozah lawng a um lai timi kan hna a rak tla. Asinain NUG sin ahcun Chin ram chungah CNF a um timi kha an hna kan tlak pi. Cun Chin ram chung a humhimtu, a zohkhenhtu dingah CNF nih ttawan kan laak kan ti.

Mah kha an lungtling i minthutmi ah aa tel. Midang tlangcung hriamtlai zong nih zeitindah federal army kan ngah khawh lai timi zong an hngalh an theih asinain Kawl pawl nih rak kan sawm hmasa hna seh timi an hngak, mah cucu kan nih CNF nih kan hngak lo.

Kan mah nih kan duhmi kha kan tuahter hna, kan duhmi an tuah ahcun kan i fonh hna lai i kan duhmi an tuah lo ahcun kan kal taak hna lai. Kan duhmi kha kan tuahter hna i an lungtling cu caah kei zong hruaitu dirhmun ka laaknak a si.” tiah a chim.

Leave a Reply