Tleihrem a tong mi:Chuncung kan farnu kong cu’A dai khobak lo a linsa chin lamang ko.

Myanmar News

Community Care for Emergency Response and Rehabilitation (CCERR) hruainak in 2020 December 6 i Chuncung khua ah “Tlaihhrem nunphung kan duh lo” tiin lam an zawhnak le tlang an aunak kong ah Cozah lei in nawl a petu Social Minister Pu Pau Lun Min Thang le CCERR lei in Lutlai Pi Biak Mawi Sung hna cu Chuncung Khuanu Khuapa le mino hna nih tazacuai an timh hna tiah thawng kan theih.

Minister Pu Pau Lun Min Thang tazacuai an timh mi kong he pehtlai in Chuncung Mino Chairman Salai Tluang Thang nih, “Pu Pau Lun Min Thang taza cuai kan timhnak a ruang bik cu, COVID-19 phungbuar in khuadang ah lamzawhnak nawl a pek hna. Zung caan a si lomi 2020 December 5 ni ah a thlithup in Cozah theihpinak um loin ca a chuahpiak hna. Cun, puai tuahnak nawl hal ningcang zul loin le a dotdot hnatlaknak tel loin amah nawlngeihnak ningcang lo hmang in nawl a pek hna, bu (Organization) tanhnak le thleidannak he a thlithup in rian a tuan. Hnatlak pinak ca a chuahmi copy cu theihter a herh mi Palek zung, Penguk Zung le khuabawi sin ah zeihmanh theihternak a tuah lo, a pek hna lo ca ah atu bantuk in tazacuai kan timh mi hi a si,” tiah The Hakha Post ah a chim.

CCERR hruainak in Latsi Nu Women Agency nih 2020 December 6 ahkhan Chuncung khua ah minung 30 tluk nih, tlaihhrem nunphung kan duh lo, nu hna cathanh kan pom dih, nu hna nih remdaihnak kan duh timi tlangtar in tlangaunak le lamzawhnak an rak ngei.

No description available.
Pi Biak Mawi Sung tazacuai an timh mi kong he pehtlai in, “COVID-19 zawtnak lio ah phungbuar in Chuncung ah lam an zawh, khuabawi hnatlak pinak ca um loin lam zawh in tlangaunak an tuah, puai tuahnak nawl ningcang hal loin lamzawh tlangaunak an tuah, zung kai lo ni zarhter ni ah a thlithup in hnatlak pinak an sok i ca an laak. Cun, Chuncung nih tlaihhrem nunphung kan ngei lo nain “Tlaihhrem nunphung kan duh lo” tiah an kan au hnawh, an kan serhsat, vawlei pi theih in kan thang an kan chiatter ca ah atu bantuk in tazacuai kan timh venak hi a si,” tiah a cunglei minung nih The Hakha Post ah a chimchap.

Leave a Reply