Hakha PDF nih mipi sin ah ralring nak thar an pek ve cang hna

Myanmar News

A Bao Tukmi Ui Kong Thawngthanhnak: Zan dai, mi chokvai um lo hnuah na ui a bao tuk ahcun ralhrang pawl nih Rungtlang in nan inn leiah bomh an rak kah khawh. Annih cu an minung umkalnak an I theih dih caah CDF minung aa chokmi an baoh hna, tiah an ruah lai. Cu lawng a si lo, na ui a bao ruangah innpa chakthlang an lau dih I lungzawtnak ngeimi pawl caah tih a nung fawn.

Cun ralhrang pawl cu nan theih cia bang, mipi umnak zawn I bomb thlak le meithal kah poi an ti lo. Sualnak ngei lo mipi nunnak zong tam tuk an thah cang. Hakha khuachung zongah ruahdamh in bomb voi zeizat dah an thlak cang.
Na uico a bao ruangah nan innpa le sang caah tih a nung. Ralhrang he kan I do lio asi. Cu caah na uico na dawt ahcun muika in inn chungah erh zokzok. Cun zan dai ah nan pawngkam ah uico a baomi cu innpa chakthlang zong nih nan daihter khawh lo ahcun a thah zong in thah cio a hau.

Cun a bao lengmang mi uico cu mipi a rungvengtu CDF minung hna ca zongah tihnung tuk mi asi. Na hrinmi na fanu, na fapale hna him tein lutchuak hna seh ti na duh ko ahcun na zuatmi uico cu bao lo ding in lam khatkhat in na fim hrimhrim a herh. Na fim khawh lo ahcun fimpi na herh tinak asi.

Thawngdang Magway remthen, Gangaw peng, Gangaw le Kalay karlak ah a ummi Htay Hlaw khua cu Sept 12, tuzing suimilam 7 hrawngah ralhrang nih mei in an khangh tiah theih a si. Khuami pakhat nih cun “Tuzing suimilam paruk le cheu hrawngah uico ralhrang nih mei in an khangh. Kan inn mei an khangh lio cu a langin kan cuanh, zeihmanh kan ti khawhmi a um lo. Khuami vialte kan himnak dingah kan zam dih” tiah a chim.

Sagaing ramthen le Magway ramthen ramri ah nifatin in ralhrang le mipi vengtu ralkap kahdohnak a um peng. Ralhrang nih khuakhat hnu khuakhat in mei an khangh.Nai teah Gangaw-Kalay karlak ah a ummi Thar Lin, Min Thar, Namkha khua i inn 80 renglo hna cu ralhrang nih mei in an khangh i khuami 20 leng an thah cang hna.

Sept 12, tuzing ah Gangaw le Kalay karlak ah Kalay lei in zei bantuk mawtaw hmanh umkal lo dingin PDF Kalay nih cathanh an chuah. Ralhrang nih umkalnak ah mawtaw sawhsawh an hman tawn caah Gangaw le Kalay karlak ah a umkalmi mawtaw paoh cu kan kah cang lai tiah mipi sinah ralrin peknak cathanh an chuah hi a si. PDF Kalay nih cun an page ah a tanglei bantukin an tial.

“Kahdohnak ruangah Kalaymyo le Gangaw karlak ah mawtaw in umkal hlah u tiah PDF Kalay nih kan thanh lengmang cang. Tuzing in Gangaw peng Namkha le Htay Hlaw khua karlak ah PDF le ralhrang kahdohnak fak ngai in a um. Ralhrang nih umkalnak ah mawtaw sawhsawh an hman lengmang. Cucaah Kalaymyo in Gangaw lei ah zei bantuk mawtaw hmanh kal hlah u tiah ralrin kan in pek than hna. Mawtaw a kalmi cu zei bantuk an si zongah kan kah hna ko hna lai, ti kha hlankan in kan in theihter hna the chin post.

Leave a Reply