Min Aung Hlaing nih kawlram mipi dihlak caah thawngpang tha taktak a kan thanh

Myanmar News

Covid Third Wave Ruangah Ni 9 Chung Zung Pehtlai In Kan Khar Lai Tiah Rallokap Nih Thawng An Thanh Rallokap nih Covid third wave chung i runvennak ding ah July 17 in July 25 tiang zungkhar si lai tiah nihin zaan suimilam 8 thawngthanh nak ah an tuah.

Zungkhar ni ah mah innchung te ah um ding, khualtlawn lo ding , tuah lo awk thalo rian lawng tuanding , ngandamnak lei sii-inn hon dih ding le Covid  runvennak zulhphung vialte zulh ding le , zulh lo ahcun phungning ten hremnak tuah a si lai tiah rallokap nih cathanh an chuah.

Ca dang rel awk :CHIN MIPHUN LE CHINRAM SERSIAMNAK CAAH CHIN MIPI SINAH BIACAH Dawtmi le Upatmi Chinmi ka miphun hawi hna:Pathian nih in huppheng in inzohkhenh hna sehlaw uknak chia chungin luatnak le pulrai zawtnak chungin ngandamnak thluachuah in pe ko hna seh tiah thla za kaan campiak hna.

Nithaizing kan boruak hi hmuhkhawhmi ral (rallokap ralhrang) nih ningcang loin tleih, hrem le thahnawnnak le hmuhkhawhlomi ral (Covid-19 pulrai zawtnak) karlak ah thinphang thlalau in a nungmi kan si. Hi ralhrang hna chung hin luat nak dingah zeidah kan tuah lai i zeitindah kan miphun le kan ram kan sersiam lai ti le Covid-19 pulrai zawtnak hi zeitindah kan teikhawh lai i kan miphun kan damter lai ti hi ruah ding le tuah dingah sawm kaan duh hna.

Miphun luatnak le Damnak rian hi a har ko lai, a man zong a faak tuk ko lai. A harlo le a man a fahlo ahcun tuahttuan ding ah kan i thawh a herh ve hnga lo. A har ca le a man a fahtuk caah Chinmi kan dihlak in kan thawh i kan ttuan a hau.

1.Luatnak le Damnak caah a kan hruaitu hna an nawl kan zulh a hau.2.Rualrem tein ttan laaktti kan hau. Unity is strength, United we stand and Divided we fall timi kha kan hngalh a hau i lungrual tein kan dirtti a hau.3.Dingfel tein miphun dawtnak he chimrel le tuah ttuan kan hau.4.A nung Pathian kan ibochan bu in kanmah le kanmah kan i bochan le kan i bawmh a hau.

Chinmi hawi dawt, nan kut chungah zeidah a um?. Na kut chung i a ummi poh kha Chinmi luatnak le damnak caah ser khawh i zuam. Thilri chawva na ngeihlo zongah amizeipoh nih kan ngeihmi cu caan, zawnruahnak le thlacamnak hi an si. Na miphun hawi Chinmi Luatnak le Damnak caah caan pe law thlacam law rian ttuanpiak khawh i zuam.

Ramthumnak a ummi Chinmi hna, Chinram ah Chinmi na miphun hawi hna cu zalonnak an hmu lo. Ralhrang ruangah thinphang thlalau in an nung i pumsa he lungthin he hrem tuarmi an si. Luattertu an herh. Cu hlei ah Covid pulrai zawtnak nih a deen hna i an i thlopkhawh tilo, an nunnak a liam thluahmah. Samaria mittha pa/nu an herh. Hodah a tho lai?

Pastor le Evangelist lawngte Chinmi chungin minung 78 an nunnak a liam cangmi hi sawhsawh asi bal lailo. Chinmi hi kan sining iremh kan hauh ca zongah asi ko lai. Pathian thawngttha phuan kha mah larnak popularity le mah miaknak caah kan hman sual ruangah Sehtan hriamnam hi i ralrin kan thiam tilo ca zongah asi khomi asi. Chinmi nih Kri kan zumh ning zonghi ningcanglo in asi sual maw ti kha zoh tthan a hau men lai. Pathian ningcang (God’s order) a zulmi krifa si ding ah thlacam deuh usih. Krifabu denomination kan vaa tthentuk ning hi le bia le holh in kan i doh i kan i soisel ning zong hi zawtnak phunkhat le Sehtan hriamnam pakhat asi khomi asi ko. Iralring hna usih. Chinmi cu pakhat le pakhat i cawisaang hna usih.

Kawlram um kan miphunnhawi Chinmi hna hi an harnak le an sifahnak tawlrel piaktu dingah cozah zong an ngei ti lo. Ramthumnak a ummi nangmah le keimah hi Chinmi caah Cozah cu kan si. Kan miphun luatnak le damnak caah an herhmi vialte a tawlrelpiaktu kan si ve kha philh hlah uh.

CDM le CDF cawlcanghnak bawmh i dothlennak ah teinak hmuh ding le Pulrai zawtnak teikhawh i miphun dam ter dingah na caan, na thazaang le nan ngeihchiah na sian ahcun nithaizing Chin miphun le Chinram sersiamnak ding caah bawmtu taktak na si ko lai. Atu hi caanttha asi. I thawhlaw ttuanvo laa ve ko. A har ko lai, nain ihneek ko. Chimphuan khawhlomi laksawng luatnak le damnak nih aan hngah ko kha philh hlah.

Chin miphun le Chinram sersiamnak caah na tuahttuanmi vialte cu Pathian caah ka tuahttuanmi asi ko ti kha zum ko. Miphun le ram na dawt cu Pathian na lawmhter asi. Miphun le ram hi Pathian pekmi an si. Miphun le ram luatter ding, damter ding le sersiam dingah kaan sawm. Pathian nih thluachuah in pe ko seh.Bawi Khrih ah, Dennis S. MaungGeneral Secretary Chin Christian Council in Australia the chin post.

Leave a Reply