SAC ralhrang thawng peh tu dalan pa thah a si hoi

Myanmar News

Yepitkyi(ေရျပစ္ႀကီး) khua pyusawthi hna hruaitu pakhat nam tuk in thah a tong Kyautsae(ေက်ာက္ဆည္) peng Yepitkyi (ေရျပစ္ႀကီး) khua in ralhrang phu sin ah thawng petu pyusawthi hna hruaitu tiah ruahmi pakhat Aye Min Mawng cu nam in thah a tong tiah khuami hna nih an chim.

Kum 40 luan hrawng si mi Aye Min Mawng cu Yepitkyi (ေရျပစ္ႀကီး) khua thlanhmun pawngah August 19 zaan suimilam 12 hrawngah nam in thah a ton hi a si.

“Amah cu pyusawthi hruaitu a si,pawngkam khua te lei ah ralhrang phu nih raldoh cawnter nak kong ah a mah nih a hruai hna,khuachung zong in amah thawng pek nak ruang ah tlaihmi an tam ” tiah khuami hna nih an chim.

A thi mi Aye Min Mawng cu ralhrang phu hna nih pekmi meithal tawi aa tlaih tu zong a si tiah khuami hna nih an chim.Atu ah cuka hmun khua pawng hrawng ah nawlngeihnak la tu ralhrang phu hna nih checkhlatnak an tuah tiah theih a si.

Thawngdang Vawleicung biaceihzung nganbik International Criminal Court (ICC) ah Myanmar aiawhtu si kho dingin NUG nih kan i zuam cuahmah lio a si tiah NUG in nuhrin covo lei vuanci U Aung Myo Min nih a chim. Vawleicung huap nuhrin covo kong ngiathlaitu bu a simi Fortify Rigth nih August 19 ah “Myanmar ram ah a cangmi sualnak hna hi ICC nih biaceih dantatnak a tuah khawh nakhnga NUG Cozah nih zeitindah hma a lak lai” timi tlangtar in biaruahnak a tuah i cu biaruahnak ah cun U Aung Myo Min nih a cunglei bantukin a chimmi a si.

NUG nih Rome Statue ah min a thut i Myanmar aiawh in ICC chungtel a si ahcun ralhrang nih an tuahmi sualnak le thatlonak vialte ICC nih biaceih dantatnak tuah khawhnak lam tampi a awng lai.

NUG in nuhrin covo lei vuanci U Aung Myo Min nih cun “Tuni ah a biapi tukmi thanh ding ka ngei. NUG cozah nih ICC i Rome Statue ah chungtel si kan duh tiin a luancia July 17 ah khan ICC ah ca kan tial cang. Cu ca chungah cun ICC zulhphung Article 12, section 3 nak bantukin 2002, July 1 thok in Myanmar ramchungah a cangmi thahnawnnak kongah tuanvongeitu hna kawlnak, hlathlainak, tazacuainak le dantatnak hna kha ICC nih a tuah khawh nakhnga timi saduhthah he NUG nih ICC nawlngeihnak cu kan cohlan tiah kan laughter. Kan catialmi ah atulio NUG President nih min a thut. NUG nih cun dinnak le tuanvo laknak a um khawhnak dingah ICC he tuanti dingin kan i ruahchan” tiah a chim.

Fortify Rigth a dirhtu Matthew Smith nih hitihin a chim ve. “Nihin i kan chuahmi cathanh dal khatnak ah khan NUG Cozah nih International Law ningin Myanmar ram aiawhtu a si kho maw timi kong kan tial. Kan cathanh ah cun aiawhtu a si kho tiah kan laughter. UN tang i nuhrin covo zulhphung UDHR Article 21 ah mipi hna duhnak kha cozah pakhat i nawlngeihnak ah a hrampi a si lai tiah a um. Myanmar mipi hna nih cun NUG hi mipi duhning in dirhmi cozah a si tiah an pom cang. Khatlei ah nawlngeihnak a lami ralhrangbu cu mipi dihlak nih an doh. Hiti an dohnak hi ralhrang rual nih ruru hranghrang in mipi an thah hna ruang lawngah a si lo. Thimnak i an sungh hnuah mipi hna nunnak thap in teirul cham an i timh ca zongah a si. Myanmar ralhrangbu nih mipi sersatnak in rampi nawlngeihnak tlaih an i tim, asinine rampi nawlngeihnak an tlaih khawh ruangah Myanmar ram aiawh in riantuan khawh a si hlei lo ti kha kan cathanh chungah tling tein kan tial”.

Tuanbia kan zoh tikah UN nih ralkap, a siloah ralhrang hna nih an uk/tlaihmi ram hna ah ralkap/ralhrangbu hna kha si loin mipi dirhmi cozah kha an ram aiawtu cozah ah a cohlanmi an um len. Tahcunnak ah Sierra Leone ram khi 1997 ah ralkap nih nawlngeihnak an lak hnu le Haiti ram ah 1991 ah ralkap nih nawlngeihnak an lak hnuah UN nih nawlngeihnak lak hlan mipi thimmi cozah kha an ram aiawtu cozah ah an cohlan hna. ASEAN chungtel a simi Cambodia zongah 1980 buainak ah khan ramdang a zammi cozah kha an ram aiawtu ah cohlan a si i nuhrin covo kong le ramkip hnatlaknak hna zongah an ram aiawh in min an thut ko, tiah Matthew Smith nih cun a chim.Thiamsang hna chimning le tuaktan ningin cun NUG hi ICC ah Myanmar aiawhtu cozah si khawhnak lam a um ko ti a lang the chin post.

Leave a Reply