Uico Ralhrang Pawl Caah Thawngpang Chia Tuk A Si Cang

Myanmar News

France zinan company Total nih ralhrangbu dantatnak ah tiin zinan le gas zuarnak in an hmuhmi tangka tampi cu ralhrangbu sinah phakter lo dingin an lungtling cang tiah Human Right Watch (HRW) nih Jan 20, nizan ah cathanh an chuah.

A luancia mi Jan 18 ah khan TotalEnergies company nih HRW sinah a kuatmi ca chungah zinan le gas in hmuhmi tangka hna cu ralhrang sin phakter loin dantat phihkharnak tuah dingah France le US cozah upa hna he an chawnhbiaknak le US le European Union nih dantat phihkharnak tuah dingin biakhiahnak an tuah ahcun Total company zong nih kan zulh ko lai tiah an langhter.

Myanmar ramchung i zinan le gas in hmuhmi tangka hna cu ralhrang sin phakter lo dingin TotalEnergies le nuhrin covo phu hna nih an lungtlin cang caah US le European Union zong nih a herhning in biakhiahnak tuah ding caan lak a herh ti lo tiah HRW i Director John Sifton nih a chim.

Total company hi 1990 in Myanmar ah nizan le gas cawh rian an rak thawk. Cu rian in an hmuhmi tangka hna cu Myanmar cozah ta a simi Myanma Oil and Gas Enterprise (MOGE) sinah an pek.

France zinan company Total cu US zinan company Cheveron le MOGE he i bawm in rian an ṭuanṭi, asinain kan hnulei ah khan zinan le gas in an hmuhmi zatuak 80% cu Thailand cozah ta a simi PTT company sinah an zuar. PTT cu South Korea company POSCO he i bawm in China sinah an pek ve tiah HRW nih an cathanh ah an langhter.

Ralhrangbu nih cun zinan le gas zuarnak in kumtinte US dollar billion pakhat renglo an hmuh peng. Atu Total nih dantat phihkharnak a tuah a si ahcun an tangka hmuhnak zeimawzat a zor lai. Total nih dantat phihkharnak tuah dingin biakhiah a tuahmi hi Myanmar ram chung i zinan le gas cawh rian a ṭuanmi company dang le Thailand company PTT zong nih i zohchunh ding an si tiah HRW nih an cathanh ah an ṭial the chin post.

Leave a Reply