UK Thithruainak In Kawlram Kong UNSC Informal Online Biaruahnak Ngeih A Si UN Security Council permanent member UK thithruainak in Kawlram kong UNSC informal biaruahnak cu nizan July 29 ah khan online in tuah a si.

Hi biaruahnak ah UNSC chungtel ram 15 chungin ASEAN telin ram 11 an kai. MA tel lo mi ram hna cu China, India le Nigar hna an si. NUG in vuanci Naw Su Zang Na Hla Hla Soe, Kawlram UN palai U Kyaw Moe Htun le KPICT chungtuan Gun San Nsang hna an kai ve.

UNSC chungtel si lo nain biaruahnak ah a tel ve mi ram hna cu Malaysia, Indonesia, Singapore le Bangladesh ram hna an si i, meting pi a si lo nain chungtel a si lo mi ram hna an k tel caah mah biaruahnak hi a biapi ngai tiah ruah khawh a si.

A bik in a tulio Kawlram ah thil a cang cuahmah mi ngandamnak lei riantuantu hna le covid-19 bawmhnak thilri hna ralhrangbu nih a tlaih mi, harsatnak a tong lio mi hna bawmhnak a phih mi le Covid-19 zawtnak kong hna a si.

Biaruahnak ah Kawlram kong ASEAN hnatlaknak cu kalpi zok zok dingin nawl a si. Estonia palai nih UN general assembly biachahnak a rak tuah cang mi ralhrangbu sin ah hriamnam zuar lo ding cu UNSC zong nih biachahnak ngei ve dingin a chim.US nih a ruang umlo an tlaihmi hna ngandamnak le nunnak cu ralhrangbu nih tuanvo a lak ding a si tiah a chim ve.

Rohingya le miphun hme pawl kong zong ceih a si i, Covid-19 vennak sii le harsatnak a tong lio mi hna bawmhnak cu a zalawngmi bu hna sin ah zalawng te in pek khawh dingin ralhrangbu sin ah an nawl.

Biaruahnak ah NUG vuanci an telh mi hi UN chungtel hna sin ah NUG hmaihngalhternak pakhat phun a si i, UK, US, Estonia, France, Norway palai hna nih Kawlram kong UNSC biakhiahnak he pehtlaih i veto power a ngei mi China le Russia an temtawnnak pakhat a si tiah chim khawh a si.

2021 February 26 UNSC biachahnak nih covid-19 doh dingah ralhrang cawlcanghnak a umnak hmun ah kahdaihnak tuah le ngandamnak lei riantuannak cu hnahnawhnak pek lo ding zong a tel mi a si.

Mah biakhiahnak an tuah lio ah hin Kawlram ah atu bantukin Kawlram ah buainak a zual rih lo i covid-19 zawtnak zong a phanh rih lo ruangah China le Russia zong nih an rak pompi mi a si caah a tu hi UK nih a hram in a vun purh than mi a si.

UNSC biachahnak kalpi dingin ruahnak a chuahpi tu hna cu UN Special Rapporteurs Tom Andrews le NUG human rights minister U Aung Myo Min hna an si.

Mah informal online biaruahnak a muru cu Kawlram UN palai kong, NUG hmaihngalhter nak le UNSC biachahnak 2565 kalpi zok zok ding a si tiah ruah khawh a si tiah BNN nih a tial.