Ramkhel (Politics) Lungchuak Ka Khuaruah A Har Termi

Theihtlei

Ramkhel (politics) lungchuak ka khuaruah a har termi: Judahmi kha lio ii, Germany a ummi a cheukhat pawl nihkhan Hitler a rak dirpitu-ttanhtu an rak um len ve. Asinain Holocaust (Hitler nih Judahmi minung ting sawmruk hrawng hrem-thahnak) a vun chuah taktak ahkhan cun a tlai tuk cang. Cu hna pawl (Hitler le Nazi Party a ttanhtu) Judahmi lila zong cu cu hrem-thahnak chung cun an luat hlei lo, ti asi. Cucu ka khuaruah a har ter ngaimi thil pakhat asi ve.

Cu hlan ii, kan rak theih tawn ning ahcun: Hitler hna cu a tir te hrim in (thah-nawnnak) a tuah hlan tein Judahmi lakah ttanhtu a ngei lai, ti hna cu zapi-zaraan nihcun kan ruat lem lai lo cu mu. Ka lung a chuakmi cu vawleicung ah a um rihmi kan si bantukin ramkhel (politics) hi mizei hmanh nih hrial khawh asi lo. Kan ttanh dingmi minung le party kha fimkhur tein thim thiam a herh bantukin kan doh dingmi policy le minung zong kha, i fian thiam cikcek a hau ve.

Ramkhel lei i thimnak (election) cu kum 5-kum 4 chung ca lawng pei asi ko lai cu ti ding asi lo. Hi kum 4-5 chung ahhin thil tampi ai remh khomi asi bantukin thil tampi a rawk khomi asi ve. Cucaah mipi nih vote (mee) thlaak tikah ruah a herh ngai vemi cu: mah pumpaak mah chungkhar le mah miphun he direct in ai pehtlaimi policy ttha le direct in a hnursuang dingmi policy ttha lo khi fimkhur tein cuaithlai thiam a hau ngai. Na pumpaak na chungkhar le na miphun a hnursuang dingmi policy ttha lo le minung kha kan ttanh-kan dirpi hna ahcun-a cung i, kan chimmi Judahmi cheukhat pawl nih Hitler an rak dirpi-an rak i ttanh sual bantuk he khin ai dannak a um lem hnga lo. Credit: Salai Van D Ceu

Leave a Reply