Salai Bawi Lian Mang: Thingkung Le Pangpar A Ming Mi Cu Ram A Daw Mi An Si

Theihtlei

Salai Bawi Lian Mang: Thingkung le Pangpar a cing mi cu Ram a daw mi an si: Ram a daw taktak mi nih Phaizawng,Chokhlei, Vaurawng, Faiceu le Senri (Thingkep par) in kip ah cin ding. Na mitthlam in hei cuan ter hmanh. In kip ah Phaizawng, chokhlei, vaurawng le faiceu khi an mah le an can cio ah hei par hna sehlaw cu khua cu mizeipoh nih a dawh an ti dih kolai. Hmuhbal an duh dih kolai.

Image may contain: tree, sky, plant, flower, mountain, outdoor and nature

Naihrawng Kanram Chinland/Lairam ah Phaizawng( Cherry tiah miphundang nih an ti),le chokhlei an vun cin ngai I lawmh a um ngaingai. A hmun i a um velo mi nih cun lunglawmh nak kut alang in kan rak bengh. Kanram kokek pangpar asi mi pi le pu chan in bia le hla ah voitampi a cuang mi pangpar hna cu Chokhlei, Vaurawng, Senri (thingkep par) Faiceu le dingdi hna hi an si. Phaizawng tu hi cu hlan pipu bia le hla ah a cuang tuk lem lo. Fiangfai le tlamtling in ka theih lo ca zong ah asi men lai.

Phaizawng, Chokhlei, Vaurawng le Faiceu hi kanmah kan ram kokek pangpar an si hna. Cu caah cin tik ah a hram a tlaih hnu ah cun titoih le zohkhen an hau tuk lo. Ai changchang te in an par fawn. Phaizawng hi khuasik November-December hrawng ah a par I Chokhlei hi January-February hrawng ah a par. Cun March thla ah Vaurawng nih a vunzulh I Faiceu hi March April hrawng ah a par. Kanmah kan ram kokek pangpar hna nih Asia continent ram a car lio can ah kan ram cu ai changchang in an thuamh.

Image may contain: tree, sky, outdoor and nature

Phaizawng, chokhlei, Vaurawng le Faiceu hi Lairam a dawhter tu ding ah nang cu tik ah na par lai I kei cu tik ah ka par lai; a changchang te in kan par hna lai tiah ai thiah mi ko an lo. Phaizawng a muici “color” phunkhat lawng asi na in Chokhlei tu cu kan ram ah hin phunthum in an um. Asen, A rang le Aihre tiah. Faiceu tu cu phunkhat lawng asi I a sen mi ahe si ko.

Vaurawng bel hi a tlangpi in a rang ( A lengpar a rang I a chung muru a sendaang) le asen-Maimaw (red-purple color)phunhnih in hmuh khawh an si. Vaurawng hi hmun dang ah cun a rang mi deuh an sinain Hakha peng ah khin vaurawng a sen-maimaw rong cu hmuh khawh an si. Phaizawng par a sunhsak bikmi kan theih mi cu Japan miphun an si. Phaizawng cu zeitindek a ci kha an tharchuah I Vawlei ramkip ah Japan Cherry tiah an kuat I an cin ter hna.

Washington DC I Congress le Lincoln Memorial tiang a thluan in an cin I a parcan ah cun a dawh ngamsam.April hrawng ah a par. Cun Australia Parliament in kam ah Phaizawng kung cu Japan laksawng asi an ti i September thla ah a par ve. A dawh ngaingai. Japan ram zong ah Phaizawng par cu an mah Japan miphun ko nih an sunhsak I an zohzuam ngaingai. Chokhlei hi Kanmah Chinmi nih cun kan miphun par (National Flower) ah kan ti I asi na in a cin in cun kan cing tuk rih lo. Tu hnu bel ah an vun cinpah fukfak.

California ah hin Chokhlei cu a ttha kho hngai I a muici color zong a phunphun in a um. Kan um nak in suimilam 4 hrawng motor vakhalh I phak khawh nak Mendocino county Fort Bragg ah hin kumchiar Chokhlei puai (Rhododendron Festival) cu an tuah tawn. California ram chaklei (Northern California) ah mi an kal duh ngai nak hmun asi. Chokhlei phunphun an cin nak hmun asi I a dawh ngaingai caah mitampi nih chokhlei puai cu an rak zawh I khuami le pawngkam khuasa caah phaisa hmuhnak ah an hman. Chokhlei ci phunphun zong an zuar.

Image may contain: sky, tree, plant, flower, nature and outdoor

Kan in hmai le kan chiarchak ah chokhlei cu kung 4-5 kan cin. A rang, a sen le Maimaw an si. Chokhlei hi vawlei chiatnak deuh Accided a tamnak ah a ttha mi asi caah asi rua, Chokhlei kung cin ding in kan cawk ah accidit cawh chih ding kha cawk chih a hau I mah accidid cu ahram ah kan phulh chih.

Kanram ah tourism in pumpaw cawmnak le chawlehthal nak hi kan nun ter kho rih lo. Tourism lei a thei mi nih cun Burma ram ah minih tlawnkal an duh bik nak hmun hi Chin ram le Kaza ram (Karreni State) hi asi na in lam le sul, riahbuk le tlawnkal nak a tthat rihlo caah mi an kal lo nak asi ti asi.

Hmailei kan tthancho deuh tik I tourism business tlawnkai le eidin hi kan ram phaisa hmuh nak ding ah kan ruah chih lai kan ti asi ah cun kan pangpar le kan fingtlang hna hi man nei te in kan zohkhenh le kan hman, kan cawisan thiam a biapi ngaingai. Hmai lei ah cun Phaizawng puai, Chokhlei puai, Vaurawng pui ti bantuk pawl zong kan ram ah kan tuah vete khawh mi asi.

Phaizawng, Chokhlei, Vaurawng, Senri (thingkep par phunphun) le Faiceu tampi in kanmah le kan khua cio ah cing usi law kan khua a hninhno, a par I kan itthat hnem pi asi ah cun cucu ram sersiam asi ko. Ramdawt timi hi, politics kong lawng chim khi asi thenglo. Thil hmete ah kan ruah mi a tak in minung caah, khua caah a tthahnem mi le aidawh mi tuah khi ramdawt cu asi ko rua. Phaizawng, Chokhlei, Senri (thingkep par) Vaurawng le Faiceu par a duh mi vialte nan kut vun thlir u luau.

Leave a Reply