Salai Van Lian Thang: 2020 Thimnak; Hrial Dingmi Le Thim A Phumi

Theihtlei

2020 THIMNAK: HRIAL DINGMI LE THIM A PHUMI

=======================

1990 thimnak ah Chin ramkulh ah meehmun 13 a ummi cu minung (candidate) 55 nih an rak icuh bal.

Ralkap uknak tangah saunawn kan um hnuah 2008 Uknak phunghram a nun hnuin Chin ramkulh ah meehmun cuh awk hmun 39 a hun um tawn. 2010 thimnak ah minung 190 hrawng nih cucu an rak icuh i 2015 thimnak ah minung 109 nih an icuh. 2020 thimnak zongah aa cuhmi hi minung a za leng an hun phan te men ko lai.

Thimnak an icuh hna tikah a ruang phunphun a um cio lai nain democracy ram tampi zongah candidate muisam phun 4 khi a um duh ngai tawn.

Phun khat cu: thimnak ah aa cuh pah lengmang nain teinak zong a hmu sasai bal lomi le cuh a duh pengmi phun khi an si. Cucu “perennial candidate” tiah an ti. Politics ah “pensen” timi a um kho lo an ti i, an thisa chungah politics a luh hnuhnu cun kum 70 leng an si hnu zongah dinh an hngal ti lo. (a political candidate who frequently runs for an elected office and rarely wins)

Cun a dang phunkhat cu “parachute candidate” tiah an ti. Meehmun (constituency) chung i hmunkhuarmi mi le sa ngaingai zong kha asi lem lo, cun cu meehmun chung a ummi mipi he pehtlaihnak zong ṭhaṭhi in a rak ngei sasai bal lem lo nain cu meehmun ah thimnak a lutmi khi an si. Hi bantuk hi “carpetbagger” ti zongin auh an si. (a political candidate who seeks election in an area where he/she has no local connections or he or she is not a native resident)

Cun phunkhat rih cu: thimnak ah tei dingin thazaang zong a chuah ngaingai lem lo, min laar duh ruang menah maw asiloah an party nih cuh lo ahcun limhaang a tla sual timi phan ruang hnaah maw asiloah thil pakhatkhat tinh ruangah a min menmen in aa taar sawh vemi kha “paper candidate” tiah an ti. Hihi “token candidate” ti zongin an ti tawn. NLD candidate T Khun Myat cu Pyithu Hluttaw speaker ah a tling lai timi a fiangcia ko nain USDP nih cuh lo piin tlinter rai asi lo tiah a sung lai theih cia komi USDP candidate Thawng Aye amin a taar sawh vemi bantuk kha asi. Election upadi ningin party pakhat nih thimnak hmun 3 aa cuh lo ahcun an party a rawk kho caah cu a rawhlonak dingah a min menin mi pathum tlinnak dingah thimnak a lutmi phun zong kha an si. (a political candidate who puts no effort into his/her campaign and is essentially just a name on the ballot)

Cun a donghnak phunkhat cu: thimnak ah teinak hmuh thengmang kha aa tinhmi taktak si lem loin an duh lomi candidate pakhatkhat tlaakter duh ruangah maw asiloah thimfung thlatu hna mipi lungthin tuaitam in thimfung vaivuanh le ṭhenṭhek i mi pakhatkhat sunghter i mi pakhatkhat hlawknak hmuhter duh ruangah maw thimnak a lutmi phun khi an si. Cucu “dummy candidate” tiah kawh an si. Vawlei kakip ah phaisa ngeimi cheukhat nih an hmanmi “strategy” phunkhat khi asi tawn. Hihi “feeder candidate” ti zongin an ti. (a candidate who stands for election with no intention or realistic chance of winning. He/she has an ulterior motive for being in the race, such as to dishonestly divert votes away or to confuse the voters or to cut that candidate’s vote share)

Democracy lamthluan chung lam kan zawh hi a no pah rih nain 2020 Chin ramkulh thimnak ah vawleicung hmun tampi ah a um tawnmi candidate phun hi Chinram zongah a phun a hun tling pah ve colh ko in a hun lang. Democracy tiluan chung thukpiin kan luh hlanah a ngan a dammi le a thianghlimimi politics in kan miphun hi kan tuam colh a herh ngaingai.

Ram le miphun tunmer sersiamnak ah hriamnam ṭhabik cu “politics” asi ko. Ram le miphun sersiam duhnak lungput he asi phot ahcun: perennial candidate zong, parachute candidate zong, paper candidate zong upat hmaizah awk an si. Sihmanhsehlaw, vawleicung khoika hmun hmanhah “dummy candidate” timi phun cu a ṭhatlomi ziarngeihnak lungput le a thianghlim lomi politics in a chuakmi an si tawn caah a puitlingmi lungfim mizapi nihcun hrial an si tawn.

Ralkap ukchanah kan itinhmi kawltung (goal) cu: “Federal democracy” ram ser a rak si. Cu phaknak ah kan itlaihmi (strategy) cu: “tripartite dialouge” a rak si. Cu a chuah khawhnak caah kan hmanmi (tactics) pawl cu: international pressure, armed struggle le people’s power tbk. an rak si.

Tu zongah kan kawltung hi cu aa thleng bal lo. Kan itlaihmi “strategy” zong aa thleng bal lo. Hluttaw chungah Tatmadaw, Democracy aupimi Kawlmi phu, tlangcung miphun tiah politics kha kilthum muisam (tripartite nature) in a kal peng ko. 2018 constitution review committee chung zongah cu kilthum hoihin bia le hla kha a kal ko. Ramkhel biaruahnak (UPDJC) cabuai zongah kilthum pungsan thotho in a kal ko lai. Hi phuthum nih federal timi cu an aupi dih. Nain, zeibantuk “federal type” timi zonah a hohmanh kan i khat hna lo. India phun maw, US phun maw, Canada phun maw, zeiram he hmanh aa khat lomi Kawlram kokek federal type phun maw kan serchom lai, kan thei deuh rih lo. Tuni ah kan ram a ṭha rih lo kan timi hi cu zonah kan dirhmun aa khah khawh rih lomi khi a hrampi cu asi ko. Pakhat le pakhat kha fakpiin ideet khi a hau-NCA lampi chung zongin, Hluttaw lampi chung zongin khoika lampi a hun chuakmi chung zongin kan ideet hna kha a hau. Cu deetnak thazaang cu: tlangcung miphun nih kan herh ngaingaimi cu asi peng. “Thazaang” aum locun cabuaicung ah biaruahpi awk tlakah an kan rel lo pinah limhang zong a um lo i neeknak le zawmhtaihnak hna ah a cang chih fon tawn.

Ralkap ukchan ahcun: kan “strategy” phaknak (ramkhel cabuaicung an hun kai duhnak) caah kan thazaang cu: UN special envoy, UN special rapporteur le western sanctions tbk (international pressure) kha an rak biapi ko. Kan nornak hna thazaang lawngte a rak si. Cun 2017 Saffron Revolution (people’s power) tbk. zong an rak biapi ve ko. Cun hriamnam thazaang (armed struggle) zong nornak pakhat a si i a biapi ngaingai ve. 2008 phunghram a nun hnu in tuchun ahcun: “electoral politics” timi kha kan hmanrua thazaang (tactics) biapi ngai pakhat ah aa hun chap. Cucu lungfim tein tlangcung miphun nih kan hmanthiam hi a hau tuk ko tiah Kawlram thimnak a phak poahah “electoral politics” ah tlangcung miphun thazaang a ṭhawn hi a biapi ngaingai ko kan ti pengnak cu asi tawn.

“Armed struggle” ṭhawn zong kha tlangcungmi kan hmanrua (tactics) tho asi i, “electoral politics” ṭhawn zong hi tlangcungmi kan hmanrua (tactics) thotho khi asi. Kan kawltung lei luhnak caah a biapimi kan hmanrua dih an si. Thil dangpipi an si hna lo. Khat lei kutah vainam le khat lei kutah hreitlung bantuk khi an si. Kan ral nih UWSA bantuk “armed strength” zong an tih bantukin ANP le SNLD bantuk “electoral strength” zong an zenhmi asi.

Ramkhel hrihhram chah ngeimi “political oriented, veteran politician” phun hi kan ram nih a herh ngaingai. “Technocrats” cu cozah nih lam dang tein a hmannak zon hi a tampi tawn ko. Ram hruainak cu “political leadership” asi khi a biapi ngaingai. 2020 thimnak ah a biapi ngaingaimi cu “dummy candidate” phun poah ralring tein hrial ding le tlangcung miphun politics ṭha tein a lung a fiang i dirhmun le tlaihtleng reprai ṭha tein a ngeimi “candidate” kha thim a phumi cu an si ko hna lai.

Siaherehnak he,

Salai Van Lian Thang
09.08.2020

Leave a Reply