US nih ASEAN ram hna Zarhkhat Chung Online Meeting an tuah pi hna lai American ramdang pehtlaihnak vuanci Antony Blinken nih American nih ASEAN ram hna a ngaisak ning a langhternak le Kawlram kong ceihpi dingin hmaizarh thawkin ASEAN hruaitu hna he zarh 1 chung online meeting a ngeihpi hna lai tiah reuters nih nizaan July 31 ah a chim.

Blinken nih hmaizarh chungah ASEAN chungtel ram 10 ramdang pehtlaihnak vuanci hna he online meeting voi 5nak cu ni fatin tuah dingah timhtuah a si i, mah ahhin Mekong delha ah a um mi Myanmar, Cambodia, Laos, Vietnam le Thailand ram hna he biaruahnak zong tuah a si lai.Mah hi US a cozah nih mah ram hna cungah zeitluk dah a ngaisak ti langhternak chinchiahnak pakhat a si tiah tuanvo ngeitu pakhat nih a chim.

Kan hnu kum hrawngah US nih ASEAN meting a kai tuk theng lo, a kai hmanh ah rank a hniam mi palai hna lawng a thlah tawn mi a si.Joe Biden president a si hnuah US nih milu 600 leng an umnak ASEAN cu a ngaisak tuk lemlo caah Taluk nawlngeihnak nih a tei deuh cang ti chimhrelnak a um caah atu bantukin US, Secretary of State Antony Blinken nih meeting tuahpi a timh mi a si tiah theih a si.

Mah hi US policy a thlennak pakhat zong a si i, mahtin a thlennak hi kan hnulei ah US ramdang pehtlaihnak vuanci changtu Wendy Sherman nih Indonesia, Cambodia le Thailand a tlawn hnu le US defence secretary Lloyd Austin nih Singapore, Vietnam, Philipine a tlawn hnuah a si.

A rauh hlan ah US vice president Kamala Harris nih Singapore le Vietnam ah tlawn a tim than. Mah hi US nih ASEAN ram hna cung i a lungput a langhternak a si tiah an ti.

US nih mah ram hna kongah a bikin a ruah mi lakah covid-19 vaccine zong a tel lai tiah ruah a si. US nih hin ASEAN ram cheukhat hna sin ah covid sii a rak pek cang nain hmaizarh chungah covid-19 sii 23 million pek than a timh. August 1 ah Vietnam sin ah Moderna covid-19 vaccine nuai 3 pek a timh tiah official pakhat nih a chim.

US nih vaccine a pek ding mi ram ah hramhram in uknak a la tu, kharphihnak an tuah lio mi ralhrangbu hna nih a uk lio mi Kawlram cu a tel rih lo.

Hmaizarh online meeting ah ralhrangbu ramdang pehtlaihnak vuanci zong a tel ve lai. Mah hi ralhrangbu cu cozah ah kan cohlan bia si lo in US lei nih a chim duh mi a um caah kai nak nawl a pek bia a si.Misual ralhrangbu hruaitu hna ruangah Kawlram cu ASEAN in chuahter ding ruahnak lungput kan ngei lo. US nih NUG rianngeitu hna he zong chawbbiaknak a ngeih lio a si tiah official pakhat nih a chim tiah reuters nih a langhter the chin post.